Հայաստանը կարևորում է առևտրատնտեսական կապերի զարգացումը ԵՄ-ի հետ

Հայաստանը հետամուտ է լինելու Եվրամիության հետ առևտրատնտեսական կապերի զարգացմանը և խորացմանը:

Այս մասին ԵՄ-Հայաստան խորհրդարանական համագործակցության հանձնաժողովի նիստում ասաց ՀՀ էկոնոմիկայի նախարարի առաջին տեղակալ Գարեգին Մելքոնյանը: «Հայաստանը Եվրամիությունը դիտարկում է որպես կարևոր տնտեսական գործընկեր: Հայաստան-Եվրամիություն հարաբերությունները շատ հարցերում մեզ օգնել են, և ներկայումս, ինչպես նաև ապագայում լավ հարթակ ու հնարավորություն է լինելու' ձևավորելու ակտիվ ռեֆորմի գործընթաց Հայաստանի ներսում տարբեր ոլորտներում»,- «Արմենպրես»-ի հաղորդմամբ՝ նշեց Մելքոնյանը:

Գարեգին Մելքոնյանը նկատեց, որ վերջին շրջանում հատկապես ակտիվացել են Հայաստան-ԵՄ հետագա համագործակցության ուղիները ուրվագծելու շուրջ քննարկումները: «Այս գործընթացի նպատակն այն էր, որպեսզի մասնագիտական քննարկումների մակարդակով նախանշվեն ուղղություններն ու ոլորտները, որոնց սահմաններում հետագայում պետք է քննարկվի Հայաստան-Եվրամիություն համագործակցության ապագա իրավապայմանագրային փաթեթ: Կարծում եմ, արդեն իսկ ձևավորված կարծիքը մեզ հնարավորություն է տալիս վստահորեն ասել, որ առևտրատնտեսական հարաբերություններին առնչվող շատ հարցեր մենք կկարողանանք ներառել նոր ստորագրվելիք փաթեթում»,- հայտարարեց Մելքոնյանը:

Փոխնախարարը հատուկ ընդգծեց այն հանգամանքը, որ վերջին երկու տարում Հայաստանը շարունակել է ակտիվորեն իրականացնել Եվրոպական Միության կողմից տրամադրվող ծրագրերի իրականացումը Հայաստանում: «Թվինինգ», «Թայեքս», «Սիգմա» ծրագրերը, որոնք նախկինում իրականացվել են Հայաստանում, շարունակում են իրականացվել, և մենք գտնում ենք, որ դրանք լավ գործիքակազմ են և լավ հնարավորություն ոչ միայն շարունակելու Եվրոպական Միության աջակցությունը, այլ նաև ապահովելու մասնագիտական արդյունավետ երկխոսություն Հայաստանի և Եվրամիության հարաբերությունների ոլորտային համատեքստում»,- մանրամասնեց Մելքոնյանը:

Մելքոնյանը հիշեցրեց, որ Հայաստանն ավիացիայի ոլորտում ընդունել է «Բաց երկնքի» քաղաքականությունը՝ հույս հայտնելով, որ առաջիկայում ԵՄ-ն կօգտվի այս հնարավորությունից և քայլեր կձեռնարկի շուկայում իր դիրքերը բարելավելու ուղղությամբ: