TV5 Monde հեռուստաընկերությունը Հայոց ցեղասպանության տարելիցի միջոցառումների վերաբերյալ հաղորդում կպատրաստի

Ֆրանսիական հայտնի TV5 Monde հեռուստաընկերությունը հնարավոր է մինչև տարեվերջ հեռարձակվի Հայաստանում: Ճանաչողական այցով մեր երկրում են TV5 Monde-ի ներկայացուցիչները, ովքեր քննարկում են առաջիկա ծրագրերը:

TV5 Monde հեռուստաընկերության Եվրոպայի տարածաշրջանային տնօրեն Դիան Կուդերկին մարտի 20-ին լրագրողների հետ զրույցում ընդգծեց, որ Հայաստանի կառավարությունը աջակցում է TV5 Monde-ի տեղակայմանը մեր երկրում:

«Ժամկետները դեռ հստակ չեն, հույս ունենք այս տարվա վերջին ավարտել աշխատանքները, և աշնանը TV5 Monde-ը հեռարձակվի Հայաստանում: Սա մեզ համար շատ կարևոր է: Հայաստանը միշտ եղել է մեր սրտում, մենք շատ լավ ենք ճանաչում ձեր երկիրը, որի պատմությունը հաճախ է խաչվել Ֆրանսիայի պատմության հետ: Մենք նաև լավ ճանաչում ենք Հայաստանի մշակութային ժառանգությունը, նրա տաղանդներին և հանճարներին, որոնք այս երկիրը մեզ համար դարձնում են հարազատ, ինչպես օրինակ՝ Շառլ Ազնավուրը, Անրի Վերնոյը, Ռոբեր Գետիկյանը և այլք»,- «Արմենպրես»-ի փոխանցմամբ՝ նշեց Դիան Կուդերկին:

Նրա խոսքով՝ Հայաստանում շատ ֆրանկոֆոններ կան, և TV5 Monde-ը հնարավորություն կտա տարբեր մշակույթներ կրող մարդկանց փոխանակումներ իրականացնել:

«Հայաստանը հանձն է առել, որպեսզի նպաստի ֆրանկոֆոն լրատվամիջոցների՝ հատկապես TV5 Monde-ի մուտքը Հայաստան: TV5 Monde-ը ժամանց կազմակերպելու, տեղեկություն տրամադրելու, տարբեր իրադարձություններ լուսաբանելու նպատակ ունի: Մեր թիմը Հայաստան է ժամանել, որպեսզի լուսաբանի Հայոց ցեղասպանության 100-րդ տարելիցի միջոցառումները և ծրագիր պատրաստի: Այնուհետև մեր հաղորդումներից մեկը նվիրված կլինի Հայաստանում Ֆրանսիական համալսարանին, իսկ մյուսը՝ Սևանա լճին: TV5 Monde-ն առաջարկում է համախմբել աշխարհի բոլոր հեռուստադիտողներին՝ ցույց տալով, թե այստեղ ինչ է կատարվում»,- նշեց Դիան Կուդերկին:

TV5 Monde-ի հաղորդումները հեռարձակվում են ֆրանսերեն, անգլերեն, ռուսերեն ենթագրերով, ինչը թույլ է տալիս ավելի մեծ քանակով մարդկանց բարելավել լեզվի իր իմացությունը կամ սովորել ֆրանսերեն: Բազմամիլիոնանոց լսարան ունեցող ալիքը նաև ֆրանսերեն անվճար ուսուցման գործիք է:

TV5 Monde-ը ֆրանսիական ալիք է՝ աշխարհի ֆրանկոֆոնների համար: Այն ստեղծվել է 1984 թվականին: Հայաստանի արտգործնախարար Էդվարդ Նալբանդյանը մարտի 19-ին ընդունել է Ֆրանկոֆոնիայի պաշտոնական հեռարձակող TV5 Monde հեռուստաընկերության Եվրոպայի տարածաշրջանային տնօրեն Դիան Կուդերկի գլխավորած պատվիրակությանը: Երկուստեք ընդգծվել է հեռուստաալիքի դերակատարությունը ֆրանսերեն լեզվի տարածման, միջմշակութային երկխոսության, ֆրանկոֆոն երկրների համագործակցության խթանման գործում։ Հանդիպմանն անդրադարձ է արվել Հայաստանում TV5 Monde-ի հաղորդումների հեռարձակման հնարավորություններին։