Թևան Պողոսյանը ԵՄ-ի հետ նոր փաստաթղթի ստորագրում է կանխատեսում Ռիգայում կամ դրանից հետո

Ազգային ժողովի պատգամավոր Թևան Պողոսյանը Հայաստանում անցկացված «Եվրանեսթ» խորհրդարանական վեհաժողովի լիագումար նիստի և ԵՄ-Հայաստան խորհրդարանական համագործակցության հանձնաժողովի նիստերից հետո տպավորություն է ստացել, որ ԵՄ-ն պատրաստ է շարունակել երկխոսությունը Հայաստանի հետ: Մարտի 21-ին լրագրողների հետ հանդիպմանը պատգամավորը, պատասխանելով «Արմենպրես»-ի հարցին, ընդգծեց, որ ԵՄ պատվիրակները հայ պատգամավորների հետ հանդիպումների ընթացքում մի քանի անգամ նշել են, որ այսօրվա դրությամբ արդեն ավարտվել է կողմերի միջև մտքերի փոխանակության փուլը, իսկ իրենք ավելի արագացված ռեժիմով կդիմեն Եվրահանձնաժողովին, որ մանդատ ստանան Հայաստանի հետ բանակցությունները սկսելու համար: «Իսկ քանի որ մենք արդեն իսկ ունենք բանակցված տեքստեր, որի հիմքն Ասոցացման համաձայնագիրն է, ինչպես նաև վիլնյուսյան գագաթնաժողովի ընթացքում նամակների փոխանակությո ւնը, ապա նոր իրավական փաթեթի բանակցային խնդիրները շատ ավելի արագ կընթանան»,- նշեց պատգամավորը:

Թևան Պողոսյանը հիշեցրեց, որ ինքը եղել է այն մարդը, ով, սկսած սեպտեմբերի 3-ից, երբ ՀՀ Նախագահը հայտարարեց, որ Հայաստանն ընտրում է Եվրասիական տնտեսական միությունը, անընդհատ ասել է, որ առնվազն Ասոցացման համաձայնագրի քաղաքական բաղադրիչը Հայաստանը կարող է ստորագրել, քանի որ այնտեղ որևէ հակասություն չկա: «Ես նաև «Եվրանեսթ» խորհրդարանական վեհաժողովի լիագումար նիստի ժամանակ առիթ ունեցա նշելու, որ եվրոպացիները հենց իրենք պետք է գիտակցեն, որ ունեցել են մի մոտեցում Ուկրանիայի հարցում, երբ թույլատրեցին Ասոցացման համաձայնագիրն առանձին ստորագրել ու դեռ մի հատ էլ տնտեսական մասը ստորագրելու համար ժամանակ տվեցին: Եթե նման մոտեցում կար, ինչո՞ւ Հայաստանին թույլ չտվեցին ստորագրել քաղաքական մասը»,- շեշտեց պատգամավորը:

Պատգամավորն իր գոհունակությունն արտահայտեց նաև այն բանի համար, որ ԵՄ ներկայացուցիչներն ասել են, որ իրենք ոչ միայն քաղաքական մասով բանակցություններ կվարեն Հայաստանի հետ, այլ կլինի նաև առանձին տնտեսական մեծ բլոկ, որը հնարավորություն կտա տնտեսական համագործակցությունը խորացնելու համար: «Նաև նրանք մեզ ներկայացրին, որ ընդամենը մեկ ամիս առաջ Եվրամիությունը Ղազախստանի հետ նոր իրավական պայմանագիր է ստորագրել տնտեսական բաղադրիչով: Սա խոսում է այն մասին, որ ԵՄ-ում արդեն ԵՏՄ անդամ երկրի հետ առանձին բանակցություններ վարելու փորձ ունեն»,- հայտնեց Պողոսյանը:

Նա նկատեց, որ այս պահի դրությամբ և ԵՄ ներկայացուցիչներն են հայտարարում, որ պատրաստ են շարունակել համագործակցությունը Հայաստանի հետ, և Հայաստանի ղեկավարությունը: Պատգամավորը հույս հայտնեց, որ երկու կողմերն էլ կդրսևորեն քաղաքական կամք, ինչի արդյունքում, եթե ոչ Ռիգայում կայանալիք ԵՄ Արևելյան գործընկերության գագաթնաժողովի ընթացքում, գոնե դրանից հետո Հայաստանը և ԵՄ-ն կունենան համագործակցության նոր պայմանագիր: