Քաղցկեղի վտանգի պատճառով հեռացրել են Անջելինա Ջոլիի ձվարանները

Հոլիվուդյան դերասանուհի և ռեժիսոր Անջելինա Ջոլին հայտնել է, որ ձվարանների և արգանդի փողերի հեռացման վիրահատության է ենթարկվել ձվարանների քաղցկեղի առաջացման վտանգի պատճառով: Այդ մասին, ինչպես տեղեկացնում է «Արմենպրես»-ը, նա գրել է The New York Times-ի սյունակում:

Ջոլիի խոսքով՝ մի քանի շաբաթ առաջ բուժող բժիշկն իրեն հայտնել էր, որ վերջին անալիզներից մեկում հայտնաբերվել են որոշ քանակությամբ այնպիսի նյութեր, որոնք կարող են վկայել քաղցկեղի վաղ փուլի մասին:

Անալիզները ցույց են տվել, որ չարորակ գոյացություններ չկան, բայց, խորհրդակցելով մի քանի մասնագետների հետ, Ջոլին որոշել է հեռացնել ձվարանները և արգանդի փողերը, որպեսզի կանխի հիվանդության զարգացումն ապագայում: Դերասանուհին ընդգծել է, որ ավելի վաղ իր ընտանիքում քաղցկեղ է ախտորոշվել երեք կանանց մոտ, այնպես որ ինքը չէր ցանկանում ռիսկի դիմել:

Վիրահատությունը կատարվել է անցած շաբաթ: Ջոլին հայտնել է, որ դա այնքան բարդ վիրահատություն չէր, որքան մաստեկտոմիան, որին ինքը ենթարկվել է երկու տարի առաջ, բայց այս վիրահատական միջամտության հետևանքներն ավելի լուրջ են՝ ձվարանների հեռացումը հանգեցնում է արհեստական դաշտանադադարի:

«Ես այլևս չեմ կարողանա երեխաներ ունենալ, և սպասում եմ, որ իմ մարմնի հետ փոփոխություններ կկատարվեն»,- գրել է Ջոլին, նշելով, որ փնտրելու է իր իմունային համակարգն ամրապնդելու բնական միջոցներ և երջանիկ է այն մտքից, որ իր երեխաները երբեք չեն ասի. «Իմ մայրիկը մահացել է ձվարանների քաղցկեղից»:

Ըստ «Ինտերֆաքս»-ի՝ դերասանուհին ընդգծել է, որ իր հետ պատահածը չի նշանակում, որ բոլոր կանայք պետք է նույնկերպ վարվեն նման իրավիճակում: Բազմաթիվ տարբեր եղանակներ կան՝ կախված անհատական դեպքերից, գրել է դերասանուհին, նշելով, թե միայն ցանկանում է ասել, որ իմացությունն ուժ է, և հարկավոր է հոգ տանել սեփական առողջության մասին:

2013 թվականի մայիսին Ջոլին պատմել է, որ ինքը հարկադրված է եղել կրծքագեղձերի հեռացման վիրահատության ենթարկվել, քանի որ ինքը BRCA1 գենի կրող է, որը 87 տոկոս դեպքերում կրծքագեղձի քաղցկեղ է առաջացնում, իսկ 50 տոկոս դեպքերում՝ ձվարանների քաղցկեղ: Նույն այդ ժամանակ էլ նա խոստացել է, որ կպատմի մյուս այն միջոցների մասին, որոնք ինքն ստիպված կլինի ձեռնարկել քաղցկեղի զարգացումը կանխելու համար:

Ջոլին և նրա ամուսինը՝ Բրեդ Փիթը, ունեն իրենց երեք երեխաները ու ևս երեք որդեգրված երեխաներ: Վերջերս ԶԼՄ-ները նաև հաղորդել էին, որ զույգը ևս մեկ որբ երեխայի է որդեգրել Սիրիայից (տեղեկատվությունն առայժմ չի հաստատվել):