Գյումրու ռուսական ռազմաբազային տրամադրվելիք տարածքներում կկառուցվի հոգևոր մշակութային կենտրոն

Գյումրի քաղաքի Լալայան փողոցում գտնվող ռուսական եկեղեցու զբաղեցրած և սպասարկման համար անհրաժեշտ հողամասը և դրան հարակից թիվ 173/3 հասցեի հողամասը'առկա շենք- շինություններով կտրամադրվի Գյումրիում գործող ռուսական ռազմաբազային՝ հոգևոր մշակութային կենտրոն կառուցելու նպատակով:

«Հայաստանի Հանրապետության կառավարության և Ռուսաստանի Դաշնության կառավարության միջև 2012 թվականի հոկտեմբերի 3-ի' Հայաստանի կառավարության և Ռուսաստանի կառավարության միջև Հայաստանի տարածքում ռուսաստանյան ռազմակայանի տեղաբաշխման կետերի մասին արձանագրության մեջ փոփոխություն կատարելու մասին» թիվ 2 արձանագրության կնքման առաջարկությանը համաձայնություն տալու մասին նախագիծն ընդգրկված է կառավարության մարտի 26-ի նիստի օրակարգում:

«Տրամադրման ենթակա հողատարածքները բաղկացած են ներկայումս չգործող հետևյալ երեք' 3812 հեկտար, 1948 հետակտար և 1.9 հեկտար մասնաբաժին կազմող հողատարածքներից: Ռուսական կողմն այժմ օգտագործում է կիսաքանդ եկեղեցին այն իմաստով, որ այնտեղ երբեմն, հատուկ եկեղեցական ծիսական օրերին իրականացվում է հոգևոր ծառայություն: Սակայն պատշաճ կերպով շինությունն օգտագործելու համար կարիք կա հիմնավոր վերանորոգման աշխատանքներ իրականցնել, ինչը հնարավոր չէ հիշյալ տարածքները իրենց չպատկանելու պատճառով: Ռուսական կողմը, մասնավորապես 102-րդ ռազմակայանը, իր կողմից արդեն վերակառուցել է Գյումրու Մեծ Բերդում և Փառքի բլուրում գտնվող ռուսական երկու եկեղեցին: Նկատի ունենալով վերոնշյալը' համապատասխան հողատարածնքերի տրամադրման դեպքում ռուսական կողմին հնարավորություն կընձեռվի վերանորոգել ևս մեկ ռուսական եկեղեցու հին և կիսաքանդ շինություն, ինչպես նաև կառուցել հոգևոր մշակութային կենտրոն, ուր կարող են հետագայում այցելել նաև ՀՀ քաղաքացիները»,- «Արմենպրես»-ի փոխանցմամբ՝ ասված է հիմնավորման մեջ: