A-320-ի կործանման վայրում տեսագրություն են գտել ինքնաթիռի կործանման վերջին վայրկյանների մասին

Germanwings-ի ինքնաթիռի կործանման վայրում հայտնաբերվել է տեսագրություն, որտեղ արտացոլված են օդանավի անկման վերջին վայրկյանները: Տեսագրության բովանդակությանը կարողացել են ծանոթանալ գերմանական Bild հրատարակությունը եւ ֆրանսիական Paris Match-ը, տեղեկացնում Է «Արմենպրես»-ը:

Ինչպես գրում է Bild-ը, տեսագրության իսկությունը կասկածներ չի առաջացնում, թեեւ օդանավի սրահի իրադրությունը ներկայացնող պատկերը հստակ չէ: Տեսագրության մեջ չկա մեկը, որին հնարավոր լինել նույնականացնել:

Նաեւ պարզ չէ՝ նստած, թե կանգնած է եղել տեսագրությունն արած մարդը: Հաջողվել է նկատել, որ այն արվել է ինքնաթիռի պոչամասում:

Դատելով ձայնագրությունից՝ ուղեւորները գիտեին, որ հայտնվել են անելանելի վիճակում: Տեսագրության մեջ մի քանի լեզուներով կարելի է լսել «Աստված իմ» ճիչերը:

Տեսագրությունն արվել է ընդհուպ մինչեւ լեռանը ինքնաթիռի բախվելը: Մինչեւ վերջին պահը լսվում են մարդկանց ճիչերն ու լացը: Վերջին պահին տեսանելի է ֆյուզելաժի սկսված դեֆորմացիան, այնուհետեւ տեսագրությունն ընդհատվում է:

Տեսագրությունը հաստատում եւ լրացնում է այն, ինչ գրանցել է օդանավի ինքնագրիչը:

Germanwings ավիաընկերության A320 ինքնաթիռը, որը Բարսելոնից ուղեւորվում Էր Դյուսելդորֆ, կործանվել Է մարտի 24-ին Ֆրանսիայի հարավ - արեւելքում՝ Ալպերի դժվարամատչելի շրջանում: Աղետի հետեւանքով զոհվել Է 150 մարդ: Միակ հայտնաբերված «սեւ արկղի» ձայնագրությունը ցույց Է տալիս, որ աղետը դարձել Է երկրորդ օդաչուի՝ Գերմանիայի քաղաքացի Լուբիցի դիտավորյալ գործողությունների հետեւանքը: