Գերմանիայում առնվազն յոթ մարդ փոթորկի զոհ է դարձել, զոհվածներ կան Ավստրիայում և Շվեյցարիայում

Գերմանիայի մի քանի տարածաշրջաններում մարտի 31-ին մոլեգնած «Նիկլաս» փոթորկի զոհ է դարձել առնվազն յոթ մարդ, մի քանիսը վերքեր են ստացել: Ինչպես տեղեկացնում է «Արմենպրես»-ը՝ հղում անելով DPA գործակալությանը Բավարիայի և Ռեյնլանդ-Պֆալցի դաշնային երկրամասերում երեք մարդ զոհվել է ավտոմեքենաների վրա ծառերի ընկնելու հետևանքով: Սաքսոնիա-Անհալտում տղամարդու վրա բետոնե պատ է փլվել: Եվս երեքը այլ պատահարների զոհ են դարձել: Ընդսմին տուժածների ստույգ թիվն առայժմ չի պարզվել:

Ինչպես նշում է ՏԱՍՍ-ը, ոստիկանությունն ու հրշեջները շարունակում են մաքրել ավտոճանապարհները: Ավտոմայրուղիներին խոշոր խցանումներ են գոյացել փոթորկի տապալած բեռնատարների պատճառով: Անբարենպաստ եղանակն սպառնում է լրջորեն խաթարել երկաթուղային հաղորդակցությունը: Համբուրգում եղանակային պայմանների պատճառով չեղյալ է հայտարարվել 63 չվերթ:

Ըստ որոշ տվյալների՝ տարերքը մի քանի մարդու կյանք է խլել նաև Ավստրիայում և Շվեյցարիայում:

ԳՖՀ-ի արևմուտքում, հյուսիս-արևմուտքում և հարավ-արևմուտքում մոլեգնած «Նիկլաս» փոթորիկը մարտի 31-ին կազմալուծել է երկաթուղային հաղորդակցությունը մի շարք երթուղիներում: Deutsche Bahn գերմանական կոնցեռնն անբարենպաստ եղանակի պատճառով ամբողջովին դադարեցրել էր մերձքաղաքային երկաթուղային հաղորդակցությունը Հյուսիսային Հռենոս-Վեստֆալիայի դաշնային երկրամասում:

Երկաթուղային հաղորդակցությունն ընդհատվել էր Դյուսելդորֆի և Քյոլնի, ինչպես նաև Դյուսելդորֆի և Դույսբուրգի միջև: Աուգսբուրգից և Ինգոլշտադտից շարժակազմեր չէին մեկնում Մյունխեն և հակառակ ուղղությամբ:

Օդերևութաբանների տվյալների համաձայն՝ քամու արագությունը տեղ-տեղ հասնում է վայրկյանում 42 մետրի: Տարերքի պատճառով վնասվել են երկաթգծերի երկարությամբ ձգվող էլեկտրահաղորդման գծերը: