Գոգիային Բաքվից վռնդելը քաղաքական որոշում էր. HRW

Human Rights Watch (HRW) միջազգային իրավապաշտպան կազմակերպության Հարավային Կովկասի գծով հետազոտող Վրաստանի քաղաքացի Գերոգի Գոգիային թույլ չեն տվել մուտք գործել Ադրբեջան, և առանց որևէ բացատրության Բաքվի օդանավակայանում անվտանգության աշխատակիցների կողմից 31 ժամ պահելուց հետո վերադարձրել են անձնագիրը և նրան ուղարկել Թբիլիսի, որտեղից ժամանել էր: Գ. Գոգիան Բաքու էր ժամանել մասնակցելու տեղացի իրավապաշտպաններ Ռասուլ Ջաֆարովի և Ինթիգամ Ալիևի դատական լսումներին:

Ինչպես հաղորդում է «Արմենպրես»-ը, HRW-ի Եվրոպայի և Միջին Ասիայի գծով տնօրեն Հյու Վիլյամսոնը միջադեպի առնչությամբ հայտարարել է. «Գոգիայի Բաքու մուտքն արգելելը վկայում է այն մասին, թե ինչքան է խորացել Ադրբեջանում մարդու իրավունքների ճնշումը: Ցնցող է, որ դա տեղի է ունենում Եվրոխաղերը հյուրընկալող երկրում»:

«Բաքվի իշխանություններն այնքան վատ բաներ են արել, որ այժմ վախենում են, որ որևէ մեկը կարող է դրա վկան դառնալ: Դա HRW-ի ներկայացուցիչների համար մուտքի առաջին արգելքն է այդ երկիր»,- հավելել է նա:

HRW-ն նշել է, որ Ադրբեջանում վերջին մեկ տարվա ընթացքում մարդու իրավունքների մի շարք ակտիվիստներ կեղծ մեղադրանքներով ձերբակալվել են:

Վրաստան հասնելուն պես Գ. Գոգիան տեղական ԶԼՄ-ներին հայտարարել է. «Ակնհայտ է, որ Ադրբեջան իմ մուտքն արգելվել է քաղաքական դրդապատճառներով: Դա Բաքվի քաղաքական որոշումն էր»:

HRW-ն հայտնել է, որ վերջին մեկ տարում Ադրբեջանում նվազագույնը 35 իրավապաշտպան են ձերբակալվել իշխանություններին քննադատելու համար: