Իրանում նշում են Հանրապետության օրը՝ պետական գլխավոր տոներից մեկը

Ապրիլի 1-ին Իրանում նշում են պետական հիմնական տոներից մեկը՝ Հանրապետության օրը: Այդ օրը Իրանի Իսլամական Հանրապետության (ԻԻՀ) հռչակման օրն է: Երկիրն սկսել է այդպես կոչվել 1979 թվականին Իսլամական հեղափոխության հաղթանակից հետո, տեղեկացնում է «Արմենպրես»-ը:

Իրանի ապագա պետական կառուցվածքի շուրջ հանրաքվեն տեղի է ունեցրել 1979 թվականի մարտի 30-31-ին: Դրան մասնակցել է ձայնի իրավունք ունեցող քաղաքացիների 92,5 տոկոսը: Պաշտոնական վիճակագրության համաձայն՝ Իսլամական Հանրապետության օգտին քվեարկել է նրանց ավելի քան 99 տոկոսը:

Հանրապետության օրն Իրանում նշվում է երկշաբաթյա արձակուրդի ընթացքում, որը կապված է Նովրուզի կամ մուսուլմանների արևային օրացույցով Նոր տարվա տոնակատարության հետ: Այդ օրերը մարդիկ նախընտրում են անցկացնել բնության գրկում, վայելել թարմ օդը: Նրանք, ում ֆինանսական հնարավորությունները թույլ չեն տալիս մեկնել առողջարան, այցելում են այգիներ և կանաչ պուրակներ:

Հանրապետության օրվա նախօրյակին Իսլամական Հանրապետության հոգևոր առաջնորդ Ալի Խամենեին հրամանագիր է ստորագրել 809 դատապարտյալների պատիժը մեղմացնելու մասին: Համաներման հրամանագիրը տարածվում է նաև զինվորական դատարանով դատապարտվածների վրա: Համաներման մասին խնդրագիրն Իսլամական Հանրապետության ղեկավարին ուղարկել էր Գերագույն դատարանի նախագահ այաթոլլա Սադեղ Ամոլի Լարիջանին, հաղորդել է ՏԱՍՍ-ը: