ԱՊՀ-ի ՀՕՊ-ի համակարգն արդյունավետորեն ապահովում է օդային սահմանների պաշտպանությունը

ԱՊՀ-ի երկրների հակաօդային պաշտպանության միացյալ համակարգի մարտական կազմը թույլատրում է արդյունավետորեն ապահովել Համագործակցության պետությունների օդային սահմանների պաշտպանությունը, առայժմ չի պլանավորվում ավելացնել համատեղ խմբավորումը: Այդ մասին, ինչպես տեղեկացնում է «Արմենպրես»-ը, հղում անելով ՏԱՍՍ-ին, ապրիլի 7-ին լրագրողներին հայտարարել է ԱՊՀ-ի երկրների պաշտպանության նախարարների խորհրդին առընթեր ՀՕՊ-ի հարցերի համակարգող կոմիտեի փոխնախագահ, ՌԴ օդատիեզերական միավորման զորքերի շտաբի պետ գեներալ-լեյտենանտ Պավել Կուրաչենկոն:

«ԱՊՀ-ի ՀՕՊ-ի միացյալ համակարգի մարտական կազմը ներառում է 21 ավիացիոն մաս, զենիթահրթիռային զորքերի 41 մաս, ռադիոտեխնիկական զորքերի 21 մաս և ռադիոէլեկտրոնային պայքարի երկու առանձին գումարտակ»,- ասել է Կուրաչենկոն՝ ամփոփելով ԱՊՀ-ի ՀՕՊ-ի համակարգող կոմիտեի նիստի արդյունքները, որն ապրիլի 7-ին տեղի է ունեցել Դուշանբեում:

«ԱՊՀ-ի ՀՕՊ-ի միացյալ համակարգի կազմի և ուժերի ու միջոցների թվաքանակի ավալացում չի պլանավորվում»,- հայտնել է գեներալը: Նա նշել է, որ ԱՊՀ-ի ՀՕՊ-ի համակարգող կոմիտեի Դուշանբեի նիստում քննարկվել է 12 հարց, որոնք «վերաբերում են ՀՕՊ-ի միավորված համակարգի կատարելագործմանն ու զարգացմանը, ինչպես նաև ՀՕՊ-ի բնագավառում ԱՊՀ-ի երկրների երկկողմ ու բազմակողմ ռազմական համագործակցության ամրապնդմանը»:

Բացի այդ, Կուրաչենկոյի խոսքով, հավանություն է տրվել օպերատիվ և մարտական պատրաստության համատեղ միջոցառումների անցկացման առաջարկներին: