ԻՊ-ը կամուրջ է պայթեցրել Մոսուլում

«Իսլամական պետությունն» ապրիլի 13-ին պայթեցրել է Մոսուլի արևմուտքում գտնվող Բադուշ կամուրջը, որպեսզի կանգնեցնի իրաքյան ուժերի առաջընթացը դեպի քաղաք: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, Բաղդադի հարավ-արևմուտքում՝ Բիաա շրջանում, ականապատ մեքենայի պայթյունի հետևանքով հինգ մարդ է զոհվել, ևս յոթը վիրավորվել են:

Անբարի նահանգի խորհուրդը հայտարարել է, որ Ալբու Ֆարաթ շրջանի ազատագրման համար լայնամասշտաբ ռազմական գործողություններ են ծավալվում:

Իրաքի վարչապետ Հեյդար ալ Աբադին, ով նաև ազգային զինված ուժերի գլխավոր հրամանատարն է, ավելի քան 300 սպաների է ազատել աշխատանքից: Նման որոշում ընդունվել է բանակի վերակազմավորման և ռազմական կարողություններ բարձրացնելու նպատակով:

Իրաքում՝ Թիքրիթ քաղաքի հյուսիս-արևելքում, սպանվել է ԻՊ-ի ղեկավարներից մեկը՝ Աբու Մարիան: Միջազգային դաշինքի օդանավերն ապրիլի 13-ին ռմբակոծել են ԻՊ-ի դիրքերը, իրաքյան Ռամադի քաղաքի հյուսիսային և կենտրոնական Բուֆրաջ, ալ Մաալբ և Թամիմ շրջանները:

Իրաքը լայնամասշտաբ ռազմական գործողություններ է ծավալում ԻՊ-ի դեմ: Անբարում լայնամասշտաբ ռազմական գործողություններն սկսվել են ապրիլի 7-ից: Իրաքյան անվտանգության ուժերը ցեղախմբերի հետ միասին ազատագրել են Ռամադի քաղաքի արևելքում գտնվող երկու շրջաններ, ինչպես նաև Անբարի մարզի արևելքում գտնվող յոթ գյուղեր:

Մինչ այդ՝ մարտի 31-ին, ԻՊ-ց ազատագրվել էր Թիքրիթ քաղաքը:

«Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և միևնույն ժամանակ ամենահարուստ ահաբեկչական կազմակերպությունը: ԻՊ կազմակերպությունում ընդգրկվել են 80 երկրի մոջահեդներ: