«Նորմանդական քառյակի» ԱԳ նախարարները կարևորել են Մինսկի համաձայնությունների ամբողջական կատարումը

«Նորմանդական քառյակի» արտաքին գործերի նախարարները Բեռլինում կայացած բանակցություններում հավաստել են Ուկրաինայում հակամարտության լուծման վերաբերյալ Մինսկի պայմանավորվածությունների անշեղ կատարման անհրաժեշտությունը: Այդ մասին, ինչպես տեղեկացնում է «Արմենպրես»-ը, հայտարարել է ՌԴ ԱԳ նախարար Սերգեյ Լավրովը՝ ելույթ ունենալով հանդիպման արդյունքներին նվիրված մամուլի ասուլիսում: Նրա ելույթից ապրիլի 14-ին մեջբերումներ է արել ՌԻԱ Նովոստին:

«Մինսկի պայմանավորվածությունները պետք է կատարվեն դրանց ամբողջ ծավալով, ոչ միայն ռազմական, այլև քաղաքական, տնտեսական, հումանիտար առումով»,- ընդգծել է Լավրովը:

Նա նշել է, որ թե ինքը, թե իր գործընկերներն անհանգստություն են հայտնել Կիևի կողմից Դոնբասի շարունակվող տնտեսական շրջափակման կապակցությամբ: Բանակցությունների մասնակիցները պաշտպանել են հակամարտության գոտում ԵԱՀԿ-ի առաքելության մշտական ներկայության գաղափարը և կոչ են արել կազմակերպությանը՝ ավելի ակտիվորեն մասնակցել տարածաշրջանում ճգնաժամի լուծմանը:

Դրա հետ մեկտեղ հանդիպմանը չի քննարկվել խաղաղապահ զորակազմ մտցնելու հարցը: Ուկրաինայի ԱԳ նախարարը հիշատակել է այդ մասին, բայց թեման զարգացում չի ստացել:

Նախարարները պայմանավորվել են քննարկել տանկերի և հարյուր միլիմետրից պակաս տրամաչափի սպառազինությունների հետքաշումը: Բացի այդ, պայմանավորվածությունների իրագործման աշխատանքային խմբի շրջանակներում ստեղծվելու է չորս ենթախումբ:

Ռուսաստանի, Գերմանիայի, Ֆրանսիայի և Ուկրաինայի ԱԳ նախարարների՝ Սերգեյ Լավրովի, Ֆրանկ Վալտեր Շտայնմայերի, Լորան Ֆաբիուսի և Պավել Կլիմկինի բանակցությունները ապրիլի 13-ին տեղի են ունեցել Բեռլինում: