Հայոց ցեղասպանության մասին հիշելը ողջ մարդկության պարտականությունն է. Հունաստանի խորհրդարանի խոսնակ

Հայոց ցեղասպանության մասին հիշելը, ցեղասպանության զոհերի հիշատակին հարգանքի տուրք մատուցելը ոչ միայն հայ ժողովրդի իրավունքն է, այլ նաև համայն մարդկության պարտականությունը: «Ընդդեմ ցեղասպանության հանցագործության» խորագրով գլոբալ ֆորումի ընթացքում իր ելույթում նման կարծիք հայտնեց Հունաստանի խորհրդարանի խոսնակ Զոյի Կոնստանտոպուլուն:

«Ցեղասպանության զոհերին հիշելը և նրանց հիշատակին հարգանքի տուրք մատուցելը ողջ մարդկության պարտականությունն է մարդկային տեսակի, մարդկային արժեքների, ապագա սերունդների նկատմամբ: Ցեղասպանության մասին հիշելը նաև կանխարգելման մեխանիզմ է»,- «Արմենպրես»-ի հաղորդմամբ՝ ընդգծեց Զոյի Կոնստանտոպուլուն:

Նա շեշտեց, որ ցեղասպանությունն ամենավայրագ հանցագործությունն է մարդկության դեմ՝ ընդգծելով, որ խորհրդարաններն իրենց ուրույն դերն ունեն նման դեպքերը հետագայում կանխելու հարցում և այդ ուղղությամբ պետք է էական ջանքեր գործադրեն: «Մենք՝ խորհրդարանականներս, պարտավոր ենք հիշել ցեղասպանության մասին: Մենք պետք է հասկանանք, որ պարտավոր ենք դիմակայել ռասիզմին, այլատյացությանը: Պետք է ընդդիմանալ նման երևույթներին, քանի որ դա լավագույն կանխարգելիչ մեխանիզմն է»,- ասաց Հունաստանի խորհրդարանի խոսնակը:

Նա հիշեցրեց, որ Հունաստանի խորհրդարանն առաջիններից մեկն է ճանաչել Հայոց ցեղասպանությունը: Զոյի Կոնստանտոպուլուն շնորհակալություն հայտնեց Հայաստանի խորհրդարանին՝ հույների ցեղասպանությունը դատապարտող հայտարարություն ընդունելու համար:

Նա նաև շնորհակալություն հայտնեց ՀՀ նախագահ Սերժ Սարգսյանին՝ Հայոց ցեղասպանության 100-րդ տարելիցի միջոցառումներին մասնակցելու հրավեր ուղարկելու համար՝ ընդգծելով, որ իր համար մեծ պատիվ է ելույթ ունենալ ֆորումի ընթացքում՝ որպես ցեղասպանություն տեսած երկրի խորհրդարանի ղեկավար: