ԱԳ նախարարը կարևորել է ցեղասպանությունների կանխարգելման գործում Կանադայի կողմից գործադրվող ջանքերը

Արտգործնախարար Էդվարդ Նալբանդյանն ապրիլի 23-ին հանդիպել է Կանադայի քաղաքացիության և ներգաղթի նախարար Քրիս Ալեքսանդրի հետ, ով Հայաստան է ժամանել Հայոց ցեղասպանության 100-րդ տարելիցի միջոցառումներին մասնակցելու նպատակով: Պատվիրակության կազմում է Կանադայի խորհրդարանի՝ Հայաստանի հետ բարեկամության խմբի նախագահ Հարոլդ Ալբրեխտը։

Ողջունելով հյուրին՝ նախարար Նալբանդյանը բարձր է գնահատել Կանադայի իշխանությունների սկզբունքային դիրքորոշումը՝ Հայոց ցեղասպանության ճանաչման և դատապարտման հարցում, և կարևորել է ցեղասպանությունների և մարդկության դեմ հանցագործությունների կանխարգելման գործում Կանադայի կողմից գործադրվող ջանքերը:

Նախարար Ալեքսանդրը նշել է, որ Կանադացի նախարարն իր համար մեծ պատիվ է համարում ն երկայացնելու Կանադայի կառավարությունը Հայոց ցեղասպանության 100-րդ տարելիցի միջոցառումներին, և ընդգծել է, որ Կանադայի խորհրդարանի երկու պալատները ճանաչել են Հայոց ցեղասպանությունը։

Զրուցակիցներն անդրադարձել են երկկողմ համագործակցության օրակարգային հարցերի, այդ համատեքստում բարձր են գնահատել Հայաստանի և Կանադայի խորհրդարաններում միջխորհրդարանական բարեկամության խմբերի գործունեությունը, որոնք լրացուցիչ լիցք են հաղորդում հայ-կանադական հարաբերություններին: Հանդիպմանը քննարկվել է երկու երկրների միջև մուտքի արտոնագրային ռեժիմի դյուրացման հնարավորությունը։ Անդրադարձ է կատարվել Ֆրանկոֆոնիայի միջազգային կազմակերպության շրջանակներում փոխգործակցությանը։

Էդվարդ Նալբանդյանն ու Քրիս Ալեքսանդրը մտքեր են փոխանակել մի շարք տարածաշրջանային խնդիրների շուրջ։