ԵՄ-ի գագաթնաժողովը միջերկրածովյան միգրացիայի զսպման ծրագիր է նախանշել

Եվրամիության պետությունների և կառավարությունների ղեկավարների արտահերթ գագաթնաժողովը, որն ավարտվել է ապրիլի 23-ի ուշ գիշերին, միջերկրածովյան միգրացիայի զսպման ծրագիր է նախանշել: Ինչպես տեղեկացնում է «Արմենպրես»-ը, ԵՄ-ի ղեկավարները որոշում չեն ընդունել իրենց երկրների սահմանները պահպանելու համար Միջերկրական ծովում նոր գործողություն գործարկելու մասին, փոխարենը պայմանավորվել են եռապատկել գործող Tritone գործողության ֆինանսավորման ծավալը՝ այն հասցնելով տարեկան 120 մլն եվրոյի, ինչպես նաև ավելացնել դրան մասնակցող նավերի, ուղղաթիռների և ինքնաթիռների թիվը:

Ծրագրի երկրորդ կետը դարձել է ԵՄ-ի բոլոր 28 երկրներում այն գաղթականների ընդունման և բաշխման վերաբերյալ հանրակցության անդամների գործողությունները համաձայնեցնելու որոշումը, որոնք հիմքեր ունեն փախստականի կարգավիճակ ստանալու համար, իսկ ում կմերժվի նման կարգավիճակ տրամադրելը, օպերատիվ կարգով կկազմակերպվի նրանց հայրենադարձությունը: Երրորդ, Եվրամիությունը հայտարարել է միգրացիոն հոսքերի պատճառների դեմ պայքարելու մտադրության մասին՝ ընդլայնելով համագործակցությունը Հյուսիսային Աֆրիկայի երկրների հետ և օգնություն ցուցաբերելով նրանց:

«Մենք պատրանքներ չէին տածում, որ մեզ կհաջողվի միգրացիայի խնդիրը լուծել այս գագաթնաժողովում, բայց մենք չենք կարող անտարբեր մնալ և պարտավոր ենք գործել անհապաղ: Մենք այս թեմային կվերադառնանք ԵՄ-ի՝ հունիսին կայանալիք հերթական գագաթնաժողովում»,- ասել է Եվրախորհրդի ղեկավար Դոնալդ Տուսկը՝ ելույթ ունենալով ամփոփիչ մամուլի ասուլիսում:

«ԵՄ-ն գերագույն ներկայացուցիչ Ֆեդերիկա Մոգերինիին հանձնարարել է առաջարկություններ պատրաստել գաղթականներին փոխադրողներին գտնելու և բռնելու և նրանց նավերի ոչնչացման վերաբերյալ»,- ասել է Տուսկը: Նրա խոսքով՝ դա արվելու է «միջազգային իրավունքին և մարդու իրավունքների հարգմանը համապատասխան»:

Մաքսանենգների նավերի կալանման կամ ոչնչացման համար բավարար օրինական բազայի բացակայության խնդիրը, որը դարձել է ծովային նոր գործողության գործարկման գաղափարից հրաժարվելու պատճառներից մեկը, ԵՄ-ի ղեկավարները մտադիր են լուծել ՄԱԿ-ի Անվտանգության խորհրդի հատուկ բանաձևի մշակման ճանապարհով, ինչի համար նրանց կպահանջվի Ռուսաստանի աջակցությունը: Այդ կապակցությամբ Ֆրանսիայի նախագահ Ֆրանսուա Օլանդը գագաթնաժողովի արդյունքում խոստացել է, որ Փարիզը կպատրաստի և ՄԱԿ-ի ԱԽ-ին կներկայացնի բանաձևի նախագիծ անօրինական միգրանտներին փոխադրողների նա վերի ոչնչացման համար:

Ինչպես հայտնել է Եվրահանձնաժողովի նախագահ Ժան-Կլոդ Յունկերը, ԵՄ-ի անդամ երկրների մեծամասնությունը հայտարարել է Tritone առաքելության համար միջոցներ հատկացնելու պատրաստակամության մասին, ներառյալ ուղղաթիռներ ու նավեր, ինչպես նաև լրացուցիչ անձնակազմ:

«Մենք որոշում ընդունեցինք՝ մշակել գաղթականներին պաշտպանելու ռազմավարություն, որը դրույթներ է ներառելու ԵՄ-ի տարբեր երկրների կողմից նրանց ընդունման և այն անձանց շտապ հայրենադարձման պայմանների վերաբերյալ, ովքեր հիմքեր չունեն Եվրոպայում փախստականի կարգավիճակ ստանալու համար»,- պարզաբանել է Տուսկը:

ԵՄ-ի արտահերթ գագաթնաժողովի գումարման պատճառ է դարձել Միջերկրական ծովում տեղի ունեցած ողբերգությունը, որտեղ նավաբեկության հետևանքով անհետ կորել են Լիբիայից մեկնած շուրջ 700 գաղթականներ: Ինչպես ապրիլի 21-ին հաղորդել է Միգրացիայի միջազգային կազմակերպությունը, այդ աղետի հաշվառմամբ, տարեսկզբից Աֆրիկայի և Եվրոպայի ափերի մոտ խեղդվել են 1,7 հազարից ավելի փախստականներ: