Իրանի դեմ պատժամիջոցները պետք է հանվեն միջուկային գործարքի ուժի մեջ մտնելուն պես. Զարիֆ

Թեհրանի դեմ սահմանված պատժամիջոցները պետք է հանվեն իրանական միջուկային ծրագրի վերաբերյալ գործարքի ուժի մեջ մտնելու հետ միաժամանակ: Այդ մասին, ինչպես տեղեկացնում է «Արմենպրես»-ը, Իսլամական Հանրապետության արտաքին գործերի նախարար Մոհամադ Ջավադ Զարիֆը հայտարարել է Նյու Յորքում ԻՌՆԱ գործակալությունը տված հարցազրույցում:

«Մենք հենց սկզբից էլ ասում էինք, որ պատժամիջոցների չեղարկումը չպետք է տեղի ունենա մեր կողմից համաձայնագրի կատարումից հետո: Ապրիլի 2-ին Լոզանում ձեռք բերված պայմանավորվածություններին համապատասխան, պատժամիջոցները պետք է չեղյալ հայտարարվեն Իսլամական Հանրապետության միջուկային ծրագրի վերաբերյալ համաձայնագրի ուժի մեջ մտնելու հետ միաժամանակ»,-ընդգծել է Իրանի ԱԳ նախարարը, որը գտնվում է Նյու Յորքում:

Զարիֆը ժամանել է ԱՄՆ՝ մասնակցելու Միջուկային զենքի չտարածման մասին պայմանագրին նվիրված ամփոփիչ խորհրդաժողովին:

Նախարարի խոսքով՝ Իրանը նաև ամերիկյան կողմից պարզաբանումներ է սպասում ԱՄՆ-ի Սենատի միջազգային հարաբերությունների կոմիտեի կողմից «Իրանի միջուկային ծրագրի վերաբերյալ 2015 թվականի համաձայնագրի բովանդակությունը» անվանումը կրող օրինագծին հավանություն տրվելու փաստին: Իսլամական Հանրապետության ԱԳ նախարարության կարծիքով՝ օրինագծում ամրագրված դրույթները, դրա ուժի մեջ մտնելու դեպքում, հետագայում ԱՄՆ-ի Կոնգրեսին իրավունք կտան վերանայել Իրանի հետ հնարավոր միջուկային գործարքը:

«Մենք ամերիկացի պաշտոնյաներից հստակ պարզաբանումներ ենք ակնկալում ներքին տարաձայնությունների (վարչակազմի և Կոնգրեսի միջև) և այն բանի շուրջ, թե դրանք որքանով կարող են ազդել իրանական միջուկային ծրագրի վերաբերյալ ապագա համաձայնագրի իրագործման վրա»,- նշել է Զարիֆը:

Դրա հետ մեկտեղ Իրանի ԱԳ նախարարն ընդգծել է. «ԱՄՆ-ի կառավարությունը պատասխանատվություն է կրում երկրի կողմից ստորագրված ցանկացած համաձայնագրի իրագործման համար: Միջազգային պարտավորություններին համապատասխան, երկրի ներքին խնդիրները նրան չեն ազատում դրանց կատարումից», հաղորդել է ՏԱՍՍ-ը: