Թուրքիայի մերժողականությունն է, որ ինձ ստիպեց ակտիվիստ դառնալ. Սերժ Թանկյանի հարցազրույցը՝ ՀԱՀ-ին

Երևանում տեղի ունեցած հանրահայտ System of a Down ռոք խմբի՝ «Արթնացրեք հոգիները» համերգից առաջ կոմպոզիտոր, քաղաքական ակտիվիստ և ռոք խմբի մենակատար Սերժ Թանկյանը Հայաստանի Ամերիկյան համալսարանում հյուրընկալվելու ժամանակ բացառիկ հարցազրույց է տվել բուհի ուսանողների The Bridge թերթի կայքին:

-Մեծանալով ԱՄՆ-ում՝ ամերիկյան մշակույթում, ինչպես է «հայկականությունը» դարձել Ձեր ինքնության մի մաս: Ի՞նչն է Ձեզ հայ դարձնում:

- Տոհմը, ծագումը, մշակույթը, այդ ամենն են հայ դարձնում: Լեզուն նույնպես իր դերն ունի: Իմ ընկեր Վահե Բերբերյանը վերջերս Հարավային Կալիֆորնիայի համալսարանում հրաշալի դասախոսություն է ունեցել: Նա շատ հետաքրքիր տեսակետ ունի մեր լեզվի պահպանման մասին, որը մենք բոլորս պարտադիր պետք է իմանանք: Հայկական մշակույթն իմ մեծ մասն է կազմում: Եթե դուք հայացք նետեք պատմությանը, ապա կտեսնեք, որ սահմանները փոխվում են, պետության ղեկավարները փոխվում են, մարդկության գույնը փոխվում է, սակայն մշակույթի գեղեցկությունը մնում է, և հայկական մշակույթը շատ հին և գեղեցիկ մշակույթներից մեկն է:

- Դուք շատ եք խոսում Հայոց ցեղասպանության և այլ անարդարությունների մասին: Եղե՞լ է արդյոք այնպիսի իրավիճակ, երբ վախեցել եք, որ ինչ-որ մեկը կսպառնա Ձեզ, քանի որ քաղաքական գործիչները, սովորաբար, չեն սիրում քաղաքական ակտիվիստներին:

- Ճիշտ է, սակայն յուրաքանչյուրն ինքն է ընտրություն կատարում: Իմ ընտրությունը վաղուց է կատարվել: Ես ակտիվիստ էի նախքան երաժիշտ դառնալը: Թուրքիայի մերժողականությունն է, որ ինձ ստիպեց ակտիվիստ դառնալ: Ես սկսեցի տեղեկանալ մարդկանց իրավունքների, շրջակա միջավայրի խնդիրներին մասին, և դա ինձ թույլ տվեց ավելին իմանալ: Երբեմն ես վախենում եմ, սակայն դա չի նշանակում, որ ես կարող է չասեմ ճշմարտությունն իշխանություններին, մենք բոլորս պարտավոր ենք դա անել: Վերջիվերջո, բոլոր ազգերը և մարդիկ պետք է իմանան ճշմարտությունը»,- պատմել է Թանկյանը:

Լրագրողի այն հարցին՝ ինչպես է նա պատկերացնում Հայաստանի և Թուրքիայի հարաբերություններն ապագայում, հատկապես՝ երիտասարդների շրջանում, երաժիշտը նշել է, որ երկու անձի միջև ցանկացած հարաբերություն պետք է առողջ լինի՝ հիմնված փոխադարձ հարգանքի և արդարության վրա:

«Ես ապագան տեսնում եմ այնպիսին, որտեղ Հայաստանը և Թուրքիան լավ հարաբերություններ ունեն։ Ես տեսնում եմ այնպիսի ապագա, որտեղ կա ապաքինում, սակայն դա պետք է լինի արդարության միջոցով, դա չի կարող լինել ամեն ինչ մոռանալու շնորհիվ»,- նշել է երաժիշտը: