Ուկրաինայի վերականգնման համար սկզբնական փուլում կպահանջվի 1,5 մլրդ դոլար. ՄԱԿ-ի գլխավոր քարտուղար

Ուկրաինայի ենթակառուցվածքների, տնտեսության վերականգնման համար սկզբնական փուլում կպահանջվի 1,5 միլիարդ դոլար: Նման եզրակացության են եկել ՄԱԿ-ի, Համաշխարհային բանկի և Եվրամիության փորձագետները, որոնք համապատասխան վերլուծություն են իրականացրել երկրի կառավարության խնդրանքով, փոխանցում է ՏԱՍՍ գործակալությունը:

Արդյունքների մասին ՄԱԿ-ի գլխավոր քարտուղար Պան Գի Մունն ուղերձով հայտնել է Կիևում անցկացվող Ուկրաինայի աջակցության միջազգային համաժողովի մասնակիցներին:

Ինչպես նշված է ուղերձի տեքստում, որը կարդացել է ՄԱԿ-ի եվրոպական տնտեսական հանձնաժողովի գործադիր քարտուղար Քրիստիան Ֆրիիս Բախը, անցկացված հետազոտությունը ցույց է տվել, որ սկզբնական փուլում ենթակառուցվածքների և ծառայությունների աշխատանքի, տնտեսական զարգացման և կյանքի համար վաստակելու հնարավորությունների, ինչպես նաև սոցիալական կապերի և հանրային անվտանգության վերականգնման համար կպահանջվի 1,5 միլիարդ դոլար: