Սաակաշվիլին վերադառնալու է Վրաստան՝ «օգնելու իր ժողովրդին»

Վրաստանի նախկին նախագահ Միխեիլ Սահակաշվիլին իր ապագան կապում է Վրաստանի հետ: «Իհարկե, ես կվերադառնամ Վրաստան՝ օգնելու իմ ժողովրդին: Իմ կարիերան պատկանում է իմ ժողովրդին»,- հայտարարել է Սահակաշվիլին ադրբեջանական ANS հեռուստաալիքին տված հարցազրույցում, տեղեկացնում է «Արմենպրես»-ը:

Նա նշել է, որ Ուկրաինայի ղեկավարությունը վերջերս իրեն առաջարկել էր բարձր պաշտոն՝ փոխվարչապետի պաշտոնը:

«Դա մեծ պատիվ կլիներ ինձ համար: Այդ դեպքում ես ստիպված կլինեի ընդունել Ուկրաինայի քաղաքացիություն և հրաժարվել Վրաստանի քաղաքացիությունից: Բայց ես դա չարեցի, որովհետև հավատում եմ, որ իմ երկիրը՝ Վրաստանը, մեծ ապագա ունի: Ես այդ ապագան կառուցելու եմ իմ ժողովրդի հետ»,- ընդգծել է Սահակաշվիլին:

Ինչպես նշում է «Գրուզիա Online»-ը, ավելի վաղ Սահակաշվիլին հրաժարվել է մեկնաբանել իրեն Թբիլիսիին արտահանձնելու վերաբերյալ Ադրբեջանի դատախազությանը Վրաստանի Գլխավոր դատախազության ներկայացրած պահանջը:

Վրաստանի Գլխավոր դատախազությունն ապրիլի 28-ին դիմել է Ադրբեջանին՝ Վրաստանի նախկին նախագահ Միխեիլ Սահակաշվիլիի ձերբակալման և արտահանձնման պահանջով:

Սահակաշվիլին, որն Ուկրաինայի նախագահ Պյոտր Պորոշենկոյի արտահաստիքային խորհրդականն է, ապրիլի 28-ին ժամանել է Բաքու և մասնակցել Բաց հասարակությունների III գլոբալ համաժողովին:

Վրաստանի Գլխավոր դատախազությունը 2014 թվականին հեռակա կարգով Սահակաշվիլիին մեղադրանքներ է առաջադրել մի քանի քրեական գործերով: Խոսքը վերաբերում է պետական միջոցներից անձնական կարիքների համար ավելի քան 8,8 միլիոն լարի ծախսելուն, 2007 թվականի նոյեմբերի 7-ին ակցիան ցրելու ընթացքում պաշտոնեական լիազորությունների վերազանցմանը, խորհրդարանի պատգամավոր Վալերի Գելաշվիլիին ծեծի ենթարկելուն և 2006 թվականին «Վրաստանի միացյալ բանկի» աշխատակից Սանդրո Գիրգվլիանի սպանությանը: