Չինաստանը ռազմական ուղղաթիռներ կուղարկի Նեպալին օգնելու համար

Չինաստանը ռազմական ուղղաթիռներ կուղարկի Նեպալ՝ ավերիչ երկրաշարժի հետևանքները վերացնելու ընթացքում անձնակազմին տեղափոխելու համար: Այդ մասին, ինչպես տեղեկացնում է «Արմենպրես»-ը, ապրիլի 30-ին հայտնել է ՉԺՀ-ի ԱԳ նախարարության պաշտոնական ներկայացուցիչ Հուն Լեյը:

«ՉԺՀ-ից փրկարարների նոր խումբը, որը բաղկացած է 49 մարդուց, նախօրյակին երեկոյան ժամանել է Նեպալ: Նրանք երկրաշարժի հետևանքների վերացման գործում իրենց գործողությունները կհամաձայնեցնեն երկրի իշխանությունների հետ, ինչպես նաև կուսուցանեն տեղի անձնակազմին… Չինացի զինվորականները նաև ուղղաթիռներ կուղարկեն Նեպալ՝ անձնակազմի տեղափոխմանն օգնելու համար»,- ասել է Հուն Լեյը ճեպազրույցի ժամանակ:

Նա նաև հայտնել է, որ Չինաստանից մարդասիրական բեռի 120 տոննա առաջին խմբաքանակն արդեն տեղափոխվել է Նեպալ, մնացած 40 տոննան տեղ կհասցվի «այսօր-վաղը»:

7,9 մագնիտուդով երկրաշարժը Նեպալում տեղի է ունեցել ապրիլի 25-ի առավոտյան: Դրա էպիկենտրոնը գտնվում էր երկրի մայրաքաղաք Կատմանդուից 82 կիլոմետր հյուսիս-արևմուտք ընկած շրջանում: Սեյսմոլոգները վերջին մի քանի օրվա ընթացքում գրանցել են շուրջ 70 հետցնցում, որոնցից ամենահզորը՝ 6,7 մագնիտուդով, գրանցվել է ապրիլի 26-ին: Ըստ վերջին տվյալների՝ Նեպալում երկրաշարժի զոհերի թիվը գերազանցել է 6 հազարը, տարերքի հարվածներից տուժածների թիվն անցնում է 11 հազարից: Նեպալի պաշտպանության նախարարության տվյալներով՝ ավերվել է 1,9 հազար բնակելի շենք, վնասված է ևս առնվազն 4 հազար շինություն, հաղորդել է ՌԻԱ Նովոստին: