Ժողովրդավարական ընտրությունները լավ հիմք են պետության կայացման գործում. Անդրեաս Բորխես

Արցախում խորհրդարանական ընտրությունները գնահատվում են որպես ազատ, թափանցիկ և համապատասխանում են միջազգային չափորոշիչներին: Տեսակետը Կալիֆորնիայի նահանգի Ֆրեզնո վարչական շրջանի կառավարիչների խորհրդի անդամ Անդրեաս Բորխեսինն է, ով Լեռնային Ղարաբաղի Հանրապետություն է այցելել ԱՄՆ-ի և Մեքսիկայի դիտորդական առաքելության խմբի հետ: Ինչպես հաղորդում է «Արմենպրես»-ի թղթակիցը Ստեփանակերտից, ԼՂՀ ԿԸՀ մամուլի կենտրոնում կայացած ասուլիսի ժամանակ Բորխեսը շեշտեց, որ ԱՄՆ-ում դեռ երբեք չի տեսել, որ ընտրություններին բնակչության մասնակցությունը մոտենա 70 տոկոսի:

Անդրադառնալով ընտրությունների վերաբերյալ ԱՄՆ պետդեպի հայտարարությանը' Անդրեաս Բորխեսը ներկաներին հիշեցրեց, որ ԱՄՆ-ն դաշնային երկիր է, և նրա մի քանի նահանգներ ճանաչել են Արցախը. «Այդ գործը միանգամից չի կարող տեղի ունենալ: Կարծում եմ, որ արդեն տեսնում եք այդ աստիճանական ճանաչումը: Այս ընտրությունները համապատասխանում են ժողովրդավարության չափորոշիչներին և դրանք շատ լավ հիմք են պետության կայացման գործում»,- ասաց Բորխեսը: Նրա համար զարմանալի չէ, որ ընտրությունների ընթացքում սահմանային վիճակը լարված է: «Սահմանային լարվածությունը կշարունակվի նաև հետագայում, երբ Լեռնային Ղարաբաղում կրկին ընտրություններ լինեն կամ համապետական այլ միջոցառումներ, քանի որ ընտրությունները պետականության արտահայտման ևս մեկ ձև են»,- ասաց Բորխեսը:

Պատվիրակության մեկ այլ անդամ Քարին Մաքդոնալդն էլ շեշտեց, որ իրենց համար անընդունելի է Ադրբեջանի դիրքորոշումը սև ցուցակների հետ կապված: «Ես արդեն Ադրբեջանի սև ցուցակում եմ: Ես երկրորդ անգամ եմ Ղարաբաղ այցելում: Մենք պրոֆեսիոնալ հետազոտողներ ենք: Չգիտեմ, թե ինչու է Ադրբեջանը կարծում, թե կարող է մեզ ասել ինչպես աշխատենք: Սա այն է, ինչ մենք անում ենք, մենք անաչառ պրոֆեսիոնալներ ենք, որոնք իրենց աշխատանքն են կատարում»,- ասաց Մաքդոնալդը: