ՀՕՊ-ին և զրահատեխնիկային վերաբերող ծրագրերը գերակա են ՌԴ-ի և Թուրքիայի համար. «Ռոստեխ»

Հակաօդային պաշտպանության համալիրների, զրահատեխնիկայի և ռազմածովային տեխնիկայի ու սպառազինությունների համատեղ ծրագրերը ՌԴ-ի և Թուրքիայի ռազմատեխնիկական համագործակցության գերկայությունն են: Այդ մասին, ինչպես տեղեկացնում է «Արմենպրես»-ը, մայիսի 5-ին ՌԻԱ Նովոստիին հայտնել են «Ռոստեխ» պետական կորպորացիայի մամուլի ծառայությունում:

Մայիսի 5-ից մինչև 8-ը Ստամբուլում տեղի կունենա IDEF-2015 պաշտպանական արդյունաբերության 12-րդ միջազգային ցուցահանդեսը: Ռուսաստանը ցուցահանդեսում կներկայացնի ավելի քան 200 անուն զենք և ռազմական տեխնիկա: Ցուցադրանքի՝ Ռուսաստանի մասի կազմակերպմամբ զբաղվում է «Ռոստեխ» պետական կորպորացիան:

«Մեր ջանքերի կարևոր ուղղությունը Թուրքիայի պաշտպանական արդյունաբերության հետ գիտատեխնիկական համագործակցության զարգացումն է: Առավել հեռանկարային ուղղություններից են այն համատեղ ծրագրերը, որոնք կապված են փոքր հեռահարության հակաօդային պաշտպանության համալիրների, զրահատեխնիկայի, ինչպես նաև ռազմածովային զանազան տեխնիկայի և սպառազինության հետ»,- ասել է «Ռոստեխի» ներկայացուցիչը:

Կորպորացիայի մամուլի ծառայությունում նշել են, որ Ռուսաստանը և Թուրքիան նաև քննարկում են կապի թվային մարտավարական միջոցների և ուղեծրային տիեզերական համակարգերի բնագավառում համատեղ ծրագրերի ստեղծման հնարավորությունը: