Երբ անընկալելի են դառնում մեծ իրագործումները

«Երկրապահի օրվա նախօրեին «Հրապարակ» օրաթերթը եթե չէր ցանկանում շնորհավորել իրենց կյանքի լավագույն տարիները մեր երկրի պաշտպանությանը նվիրած և այսօր էլ մեր երկրի պաշտպանության համար իրենց պատասխանատու զգացող երկրապահ կամավորականներին, ապա գոնե ակնկարելի էր, որ փաստերի խեղաթյուրմամբ մի նյութ չէր տպագրի թերթի առաջին էջում՝ խմբագրականին կից սյունակում:

Կարճառոտ և սխալաշատ այդ հրապարակման մեջ ասվում է, որ դպրոցներում իբրև թե դժգոհության մի նոր ալիք է բարձրանում, քանի որ ուսուցիչները և աշակերտները դարձել են ՀՀ Պաշտպանության և Գիտության ու կրթության նախարարությունների և Երկրապահ Կամավորականների Միության ստորագրած հուշագրի «գերին»: Ինչպես թերթում է ասվում. «Մեզ տեղեկություններ են հասել, որ ուսուցիչներին և աշակերտներին հանգստյան օրերին ռազմահայրենասիրական կրթության շրջանակում տանում են ԵԿՄ դասընթացների: Հանգստյան օրերին պարապմունքների գնալուց դժգոհ են թե՛ աշակերտները թե՛ ուսուցիչները»:

Անկախ ունեցած քաղաքական և այլ հայացքներից, լրագրական էթիկայից բխող տարրական պարտքն էր ստուգել հասած տեղեկությունները ու առավել ևս հասկանալ, թե լսածը ինչին է վերաբերում և նոր գրել: «Հրապարակի» խմբագրությունը քանի որ զլացել է այս պարզ հարցում և կատարվող հսկայական աշխատանքը փորձել է ներկայացնել որպես թե ԵԿՄ-ի նախագահի համար կատարվող փիառ, ասենք հետևյալը:

Վերը հիշված հուշագրի շրջանակում դպրոցներում «Պատանի երկրապահի» ակումբներ ստեղծելու համար որոշվեց յուրաքանչյուր դպրոցից ընտրել չորս աշակերտ՝ երկու տղա, երկու աղջիկ և նրանց համար կազմակերպել դասընթացներ ընդհանուր զինվորական պատրաստությունից, ինչպես նաև լրացուցիչ գիտելիքներ հաղորդել գրականությունից և պատմությունից:

Յուրաքանչյուր մարզում ընտրվեցին մի քանի դպրոցներ, որտեղ ոչ աշխատանքային օրերին սկսեցին գալ շրջակա բնակավայրերի յուրաքանչյուր դպրոցից չորսական երեխա և ոչ թե բոլոր աշակերտները, մեկ ուսուցչի և ոչ թե ողջ ուսուցչական կոլեկտիվի ուղեկցությամբ: Կամավորական նույն հիմունքներով դասավանդում են ՀՀ պաշտպանության, արտակարգ իրավիճակների, առողջապահության նախարարությունների, Ոստիկանության աշխատակիցները, հայ առաքելական եկեղեցու սպասավորներ: Ուստի այս դասընթացը շատ ավելի մեծ ընդգրկում ունի և չի նույնանում ռազմագիտություն առարկայի հետ:

ԵԿՄ –ից որպես այս ծրագրի պատասխանատուներից մեկը և ՀՀ մարզերում դասընթացների անմիջական մասնակից կարող եմ հավաստել, որ աշակերտները ոչ միայն կամավոր են գալիս, այլև նրանցից և ծնողներից եղող միակ խնդրանքը վերաբերել է դպրոցներից ավելի մեծ թվով աշակերտների ներգրավմանը:

Այս դասընթացները գոնե մարզերում ուղղակի հեղաշրջում մտցրեցին երեխաների գիտակցության մեջ, քանի որ աշակերտության շրջանում մի նոր աստիճանի բարձրացրեցին հայրենիքին տեր կանգնելու, երկիր պահելու երկրապահական առաքելության գաղափարը:

Դասընթացները նաև առիթ դարձան մարզային և Երևանի մտավորականության ավելի հաճախ դպրոցներ այցելելու, որը գնալով ընդլայնվելու է:

«Հրապարակի» աշխատակիցներին խորհուրդ կտայինք ոչ թե այստեղից ու այնտեղից տեղեկություններ լսել կամ դրանք ըստ իրենց տրված պատվերի հորինել, այլ գոնե մի անգամ ներկա գտնվել այդ դասընթացներին, զգալ տիրող խանդավառությունը, ինչպես ընդունված է ասել, վարել լրագրողական հետաքննություն և նոր գրել:

ՀՀ ՊՆ նախարար Սեյրան Օհանյանը և ԵԿՄ նախագահ Մանվել Գրիգորյանը քանիցս նշել են, որ այսօր դպրոցում իրականացվող նման աշխատանքը առաջիկայում իր շոշափելի արդյունքներն է տալու բանակում: Գլխավոր արդյունքները երկուսն են լինելու: Առաջին՝ նախազորակոչային շրջանի պատանիների ընդհանուր զինվորական պատրաստվածության աստիճանի բարձրացում և երկրորդ, ու թերևս ամենագլխավորը՝ դպրոցականների մոտ առաջ եկած ընդհանուր արժեքային համակարգի փոփոխությամբ բանակում բարոյա-հոգեբանական մթնոլորտի էական բարելավում, որն իր հերթին բերելու է միջանձնային հարաբերություններում ոչ կանոնադրական հարաբերությունների կրճատման:

Պատահական չէ, որ այս ծրագիրը և դասընթացը առավել մեծ խանդավառությամբ ընդունվեցին հենց հեռավոր և սահմանամերձ բնակավայրերի դպրոցներում:

Ժողովրդական իմաստությունն ասում է, որ առուն գտնում է իր ճանապարհը: Մեր ժողովուրդը անկախ այսօրվա սոցիալ-տնտեսական իրավիճակից մեծ խանդավառությամբ ընդունեց այս ծրագիրը, որովհետև սահմանամերձ շրջաններում առավել հստակ են զգում վերջինիս կարևորությունը, որը հաջողության գլխավոր գրավականն է:

Իբրեւ ամփոփում՝ շնորհավորեմ ամենքին Երկրապահի օրվա կապակցությամբ՝ Հայաստանի, Արցախի եւ Սփյուռքի հայությանը: Շնորհավորում եմ նաեւ նրանց, ովքեր դեռ տարիներ անց են գիտակցելու այս տոնի կարեւորությունը, երկրապահական, հայրենասիրական դասընթացների կարեւորությունը»:

ՎԱՐԴԱՆ ԴԵՎՐԻԿՅԱՆ

ԵԿՄ վարչության անդամ