ՆԱՏՕ-ի երկրների ԱԳ նախարարները Անթալիայում բացվող հանդիպմանը քննարկելու են Ուկրաինայի իրադրությունը

Հյուսիսատլանտյան դաշինքի մասնակից երկրների ԱԳ նախարարները հանդիպում կանցկացնեն Թուրքիայի Անթալիայի նահանգի Բելեկ քաղաքում՝ քննարկելու հավաքական անվտանգության ապահովման հարցերը եւ Ուկրաինայի իրադրությունը: Ինչպես տեղեկացնում Է «Արմենպրես»-ը, ՆԱՏՕ-ի անդամ 28 երկրների արտաքին գործերի նախարարներից բացի, հանդիպմանը մասնակցում են Հայաստանի, Ադրբեջանի, Բոսնիայի եւ Հերցոգովինայի, Վրաստանի, Ուկրաինայի, Մոնղոլիայի, Հարավային Կորեայի, Ճապոնիայի, Հորդանանի ներկայացուցիչները, երկրներ, որոնք աջակցություն են ցուցաբերում Աֆղանստանում դաշինքի առաքելությանը:

Երկօրյա հանդիպման ընթացքում կկայանա ՆԱՏՕ-Ուկրաինա հանձնաժողովի նիստը, որը կբացի դաշինքի գլխավոր քրատուղար Ենս Ստոլտենբերգը: Ինչպես ճշտել է Թուրքիայի արտաքին քաղաքական գերատեսչությունը, Ուկրաինայի իրադրության քննարկման արդյունքում նախարարները պլանավորում են ընդունել համատեղ հայտարարություն:

Գագաթնաժողովի առաջին օրը կսկսվի Աֆղանստանում դաշինքի նոր՝ «Վճռական աջակցություն» առաքելության իրագործման ընթացքին նվիրված նիստով: Հանդիպման երկրորդ օրը մասնակիցները ծրագրում են քննարկել 2016 թվականին Վարշավայում ՆԱՏՕ-ի գագաթնաժողովի անցկացման նախապատարստումը:

Ինչպես նշում է ՏԱՍՍ-ը, հիմնական օրակարգից բացի, նախարարները եւ պատվիրակությունների անդամները ժամանակ կունենան վերլուծելու Սիրիայում եւ Իրաքում ահաբեկիչների դեմ պայքարի ընթացքը: