Հայ պատգամավորները Բաքվում բաժանել են ԼՂՀ-ի և Խոջալուի մասին պատմող գրքույկներ

Հայկական երկրորդ հեռուստաալիքով հեռարձակվող «Խոսքի իրավունք» հաղորդման երեկվա հյուրն էր ԲՀԿ-ական պատգամավոր Նաիրա Զոհրաբյանը: Վերջինս անդրադարձ կատարեց ապրիլի 2-ից 4-ը Բաքվում տեղի ունեցած «Եվրանեսթ»-ի լիագումար նիստին և հայկական պատվիրակության մասնակցությանը: Մասնավորապես, պատգամավորը նշեց, որ իրենք Միլի Մեջլիսում բաժանել են Խոջալուի դեպքերի մասին պատմող տպագիր նյութեր:

«Մենք մեզ հետ բավականաչափ գրականություն էինք տարել։ Օրինակ՝ «Հայերը Բաքվում» գիրքը, որը մենք նվիրեցինք Եվրանեսթի խորհրդարանական վեհաժողովի պատգամավորներին, նաև ողջ ճշմարտությունը Խոջալուի մասին արտացոլող փոքր գրքույկ և Լեռնային Ղարաբաղի հակամարտության իրական սպեկտրի մասին փոքր գրքույկ, որովհետև մենք գիտենք, թե ինչպես է Ադրբեջանը շահարկում Խոջալուի իրադարձությունները, և դա նրա քարոզչական հիմնական թիրախներից մեկն է։ Այդ գրքույկը ես բաժանեցի հենց Միլի Մեջլիսի ներսում: Ինձ մոտեցան Եվրանեսթ քարտուղարության աշխատողները, որոնք Եվրապառլամենտի աշխատակազմից են՝ ֆրանսիացիներ, գերմանացիներ, և ասեցին, որ ես իրավունք չունեմ առանց քարտուղարությանը տեղյակ պահելու քարոզչական նյութեր բաժանել, որ դա ես պետք է ներկայացնեի քարտուղարություն, իրենք պետք է ծանոթանային բովանադակությանը և միայն որոշեին: Ես նշեցի, որ դա քարոզչական նյութ չէ՝ սա նվեր է, որի անունն է «ճշմարտություն», իսկ նվերից չի կարելի հրաժարվել և ես այդ երկու գրքույկները հանձնեցի հենց քարտուղարության ներկայացուցիչներին, իսկ նրանք ոչինչ ուղղակիորեն չկարողացան պատասխանել», - պատմեց Զոհրաբյանը:

Խոսելով Ադրբեջանում հայերենով գործող հեռուստատեսության մասին, որը կատարում է հակահայ քարոզչություն, Զոհրաբյանն ասաց. «Այո, գործում է նման հեռուստատեսություն, որը կոչվում է «Ազատ TV» և որի եթերում օրը մի քանի ժամ մաքուր հայերենով ուղղակի խայտառակ ապատեղեկատվություն է տարածվում: «Եվրանեսթ»–ի նիստի ժամանակ, երբ մենք նստած էինք, ելույթ ունեցավ Եվրամիության ընդլայման հարցերով հանձնակատարը, որն ասաց, որ ուղղակիորեն անընդունելի է Եվրապառլամենտի առաջարկը՝ ԵԱՀԿ Մինսկի խմբում Ֆրանսիայի մանդատը՝ Եվրամիության մանդատով փոխարինելու վերաբերյալ: Երկու ժամ հետո այդ TV-ն հեռարձակում է, որ «Եվրանեսթ»–ում Շտեֆան Ֆյուրեն հայտարարեց, որ շատ ճիշտ է և անպայմանորեն անհրաժեշտ ԵԱՀԿ Մինսկի խմբում Ֆրանսիայի մանդատը փոխարինել Եվրամիության մանդատով: Դրանից բացի ուղղակիորեն հակահայ քարոզչություն էր գնում: Բայց պետք է ասել, որ նրանք կարողանում են իրենց երկրի շահերի տեսակետից ճիշտ աշխատել», - նշեց ԲՀԿ պատգամավորը: