Վրաստանում ԵԱՏՄ-ին անդամակցելու կողմնակիցներն անհամեմատ ավելի շատ են. Բուրջանաձե

Վրաստանի խորհրդարանի նախկին խոսնակ, «Միավորված ժողովրդավարական շարժման» առաջնորդ Նինո Բուրջանաձեն չի վստահում ԱՄՆ-ի Ազգային դեմոկրատական ինստիտուտի (NDI) հետազոտությանը՝ պնդելով, որ Վրաստանում Եվրասիական տնտեսական միությանն անդամակցելու կողմնակիցներն անհամեմատ ավելի շատ են, տեղեկացնում է «Արմենպրես»-ը:

Վրաստանում NDI-ի կողմից անցկացված հերթական սոցիոլոգիական հետազոտության համաձայն՝ Եվրասիական տնտեսական միությանը երկրի անդամակցությունն ընդունելի է հարցվածների ընդհանուր թվի 31 տոկոսի համար, իսկ անընդունելի է 41 տոկոսի համար:

«Ես լավ գիտեմ, որ այդ հետազոտությունների գործնականում ոչ մի թիվ չի համապատասխանում իրականությանը, ես ստույգ գիտեմ, թե ինչ թիվ է նկարված և ինչու: Վերջին բոլոր հետազոտությունները, հատկապես նրանք, որոնք անցկացվում են ամերիկյան կազմակերպությունների պատվերով, չեն արտացոլում երկրում առկա իրականությունը և այն բանի դրսևորումն են, թե ԱՄՆ-ն ինչ պատկեր է ցանկանում տեսնել Վրաստանում»,- հայտարարել է Բուրջանաձեն «Ռուսթավի-2» հեռուստաընկերության եթերում:

Նրա խոսքով՝ «Ամերիկան, անտարակույս, չի ցանկանում, որ Վրաստանում 31 տոկոսը լինեն այսպես կոչված Եվրասիական միության կողմնակիցներ, սակայն ես ձեզ հավատացնում եմ՝ այդ թիվը կարող է անհամեմատ ավելի մեծ լինել, եթե ուսումնասիրություններն ավելի օբյեկտիվ անցկացվեն», հաղորդել է ՌԻԱ Նովոստին: