Լրացուցիչ փորձաքննության արդյունքում հնարավոր կլինի մոդելավորել Ավետիսյանների սպանությունը

Սպանության պահին Ավետիսյանների դիրքերը պարզելու նպատակով կրկին համալիր փորձաքննություն կիրականացվի: Այս մասին լրագրողների հետ հանդիպման ժամանակ հայտնեց Ավետիսյանների իրավահաջորդների ներկայացուցիչ-փաստաբաններից Միհրան Պողոսյանը' նշելով, որ ստացվել է 144 թերթից և 313 լուսանկարից բաղկացած համալիր փորձաքննություն, որը մի շարք հարցերի պատասխաններ է տալիս: Սկզբում փաստաբանը նկարագրեց ու սխեմայի տեսքով ցույց տվեց Ավետիսյանների բնակարանի կառուցվածքը: «Սկզբում Ավետիսյանների բնակարանի մուտքի մասն է, մուտքից հետո' անմիջապես աջ թևում հյուրասենյակն է, որից աջ առաջին ննջասենյակն է և մի փոքր էլ աջ' երկրորդ ննջասենյակը: Բնակարանը, հանդիսանալով երեք սենյականոց, ըստ էության ոչ թե բաղկացած է տարբեր անկյուններում տեղակայված սենյակներից, այլ ուղիղ, նեղ տարածություն է, որն իրար մեջ բաժանված է պատերով»,- «Արմենպրես»-ի փոխանցմամբ' հայտնեց Միհրան Պողոսյանը:

Անդրադառնալով Ավետիսյանների տան պատերի, մահճակալների ու այլ պարագաների վրա առկա վնասվածքներին' փաստաբանը նշեց, որ դրանց վրա, հրազենային վնասվածքներից բացի, հայտնաբերվել են նաև սվինով իրականացված հետքեր: Փաստաբանը տեղեկացրեց, որ փորձագիտական եզրակացության մեջ շեշտվել է այն հանգամանքը, որ բնակարանում անշունչ առարկաների վրա առկա բոլոր հրազենային վնասվածքները հասցվել են ինքնաձիգի փողի' հորիզոնական դիրքի պայմաններում, այսինքն' կրակոց վերևից ներքև չի եղել: Միհրան Պողոսյանը նաև տեղեկացրեց, որ Արմեն Ավետիսյանի անկողնու վրա առկա վնասվածքները սվին դանակի հետքեր են:

Բացի այդ, փաստաբանն ընդգծեց, որ կան հարցեր, որոնք լրացուցիչ պարզաբանման կարիք ունեն: «Մենք ունենք կրակոցների արձակման հավանական դիրքերը, մոտավորապես ունենք շարժման ուղղությունը, բայց դեռևս այն հարցի պատասխանը, թե տուժողներն ինչ դիրքում են գտնվել հրազենի արձակման ժամանակ, պարզաբանված չէ: Կրկին համալիր փորձաքննություն է նշանակված, որ այդ հարցերի պատասխանները ստացվեն: Տեղեկություններ կան, որ տվյալ դեպքում հնարավոր կլինի մոդելավորում իրականացնել, թե ինչ դիրքում են գտնվել տուժողները կրակոցներ արձակելու ժամանակ, նաև նրանց հետագա դիրքը, գործությունների հաջորդականությունը»,- ավելացրեց Միհրան Պողոսյանը:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև' յոթ օր հետո մահացել: Նշանակվել էին դատաբժշկական, դատատոքսիկոքիմիական, դատաձգաբանական փորձաքննություններ: Կասկածյալին ռուս սահմանապահները հայտնաբերել են հայ-թուրքական սահմանը հատելու‚ փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: