Բոլոնիայի գործընթացը հաջողված համագործակցության արդյունք է. Հովիկ Աբրահամյան

Բոլոնիայի գործընթացը հաջողված համագործակցության արդյուք է: Այս մասին Եվրոպական բարձրագույն կրթական տարածքի նախարարական գագաթնաժողովի և Բոլոնիայի քաղաքականության 4-րդ ֆորումի ընթացքում նշեց ՀՀ վարչապետ Հովիկ Աբրահամյանը: Վարչապետը ողջունեց միջոցառումների մասնակիցներին: «Մենք բարձր ենք գնահատում նման լսարանի, պատվիրակությունների մասնակցությունը երևանյան ֆորումին: Այս գագաթաժողովը որոշիչ է եվրոպական կրթության համար: Սա իսկապես պատմական պահ է, իրադարձություն, որը առաջ կտանի բարձրագույն կրթության տեսլականը»,- «Արմենպրես»-ի փոխանցմամբ' նշեց Հովիկ Աբրահամյանը:

Վարչապետն ընդգծեց, որ Բոլոնիայի գործընթացը հաջողված համագործակցության արդյունք է: «Սա նաև միջոց է զարգացող երկրների համար կիսելու իրենց փորձը, նպաստելու ուսանողների շփմանը: Այն հնարավորություն է տվել տարբեր երկրներին ստեղծել եվրոպական չափանիշներին համահունչ կրթական միջավայր»,- հավելեց նա: Վարչապետը վստահ է՝ երկրների համագործակցությունը պետք է հիմնվի փոխադարձ վստահության վրա, և Երևանի գագաթաժողովը մեծ ձեռքբերումների և վստահության գրավական է: Նա արդյունավետ աշխատանք մաղթեց մասնակիցներին:

Բոլոնիայի գործընթացի առանցքային նպատակներից է Եվրոպական բարձրագույն կրթական տարածքի ստեղծումը, որը կոչված է խթանելու Եվրոպական բարձրագույն կրթական համակարգի մրցունակությունը և գրավչությունը, ինչպես նաև ուսանողների շարժունությունն ու աշխատանքի հնարավորությունները: Բոլոնիայի գործընթացն ընդգրկում է 47 եվրոպական երկիր, 10 խորհրդատու կազմակերպություն և այլ գործընկեր կազմակերպություններ: Բոլոնիայի գործընթացի հիմնական բաղադրիչներն են' եռաստիճան կրթական համակարգ, որակավորումների շրջանակ, կրեդիտների կուտակման և փոխանցման համակարգ, դիպլոմի հավելված, որակի ապահովում, փոխճանաչում, համատեղ աստիճանների հավատագրման եվրոպական մոտեցում: