37 ոչխար կորցրած բնակչի բաց նամակը՝ ՀՀ Վճռաբեկ դատարանի նախագահ Ա. Մկրտումյանին և ՄԻՊ Կ. Անդրեասյանին

ԱՐԽԻՎ 19 Մայիս, 2015 10:50

Արմավիրի մարզի Նոր-Արտագերս գյուղի բնակիչ Զադա Ղուլիի Բրոյանը բաց նամակով դիմել է ՀՀ Վճռաբեկ դատարանի նախագահ Ա. Մկրտումյանին և Մարդու իրավունքների պաշտպան Կ. Անդրեասյանին: Բաց նամակում, մասնավորապես, ասված է.

«Հարգելի պարոնայք խնդրում եմ Ձեր իրավասությունների սահմաններում օգնեք ինձ արդարադատության հասնելու համար:

ՀՀ քննչական կոմիտեի Արմավիրի քննչական բաժնի կողմից կայացված անօրինական որոշումը՝ քրեական գործի վարույթը կարճելու մասին, ՀՀ Արմավիրի մարզի ընդհանուր իրավասության դատարանի կողմից վերացվելուց հետո քննչական բաժնի կողմից կատարվել է ինձանից թաքուն քննություն և կրկին քրեական գործի վարույթը կարճվել է:

Քննիչի անօրինական որոշումը կրկին բողոքարկել եմ դատարան, որի քննությունը նշանակվել է 20.05.2015թ.:

2014 թվական հունվարի 09-ից պայքարում եմ իմ խախտված իրավունքները վերականգնելու համար: Արդեն համոզվել եմ, որ եթե պաշտոնատար անձն է կատարում հանցագործությունը, ապա Արմավիրի քննչական բաժինը դառնում է նրանց պաշտպանը և ջանք ու եռանդ չի խնայում նրանց պաշտպանելու համար: Տոնական Ղազարյանը հեղինակավոր մարդ է և իր կապերն օգտագործելով կարող է հասնել իր ուզածին:

2014թ. հունվարի 09-ին, ժամը 18-ի սահմանններում Արմավիրի մարզի Արտամետ համայնքի նախկին ղեկավար Տոնական Ղազարյանը, որը ներկայումս զբաղեցնում է այլ բարձր պաշտոն, իր կողմից վարած Միցուբիշի Մոնտերո մակնիշի ավտոմեքենայով Բաղրամյան-Արտամետ ավտոճանապարհի 5-րդ կմ-ի հատվածում երթևեկելով բարձր արագությամբ չկարողանալով կանգնեցնել մեքենան մխրճվել է իմ ոչխարի հոտի մեջ և վրաերթի ենթարկել թվով 37 ոչխարների: Տոնական Ղազարյանը մինչ օրս չի հատուցել ինձ պատճառված վնասը: Քրեական պատախանատվությունց խուսափելու համար Տոնական Ղազարանը քննչական մարմնին հայտնել է, թե իբր դրսում մառախուղ է եղել, որի պատճառով ինքը ոչխարների հոտը նկատել է 15 մետրից և չի կարողացել կանխել վթարը: Այնինչ դեպքի պահին դրսում մառախուղ չի եղել, այդ ամենը հորինված է, այդ ամենը հաստվում է իմ և որդիներիս ցուցմունքներով, հատուկ քննչական ծառայությունում Կիրակոս Երիցյանի կողմից տրված ցուցմունքով, ֆոտոլրագրող Գագիկ Շամշյանի կողմից դեպքի վայրում կատարված լուսանկարահանումներով և «Հայաստանի հիդրոօդերևութաբանության և մոնիտորինգի պետական ծառայություն» ՊՈԱԿ-ի կողմից տրված տեղեկատվությամբ: Սակայն Արմավիր քննչական բաժինը հավատալով Տոնական Ղազարյանի հեքիաթին սխալ և թերի ելակետային տվյալներ է ներկայացրել փորձագետներին, իսկ փորձագետներն էլ հիմք ընդունելով այդ ելակետային տվյալները եզրակացություն են տվել այն մասին, որ 15 մետր տեսանելիության պայմաններում Տոնական Ղազարյանի մեղքը բացակայում է, իսկ վարորդի կողմից ՃԵԿ-ի 65-րդ կետի խախտմամբ թույլ տրված գործողություններով պայմանավորված չէ ոչխարների հոտի վրաերթը: Քննչական բաժնի կողմից փորձագետին ներկայացված ելակետային տվյալների համաձայն վտանգի առաջացման պահին վրաերթի ենթարկված բոլոր 35 ոչխարները գտնվել են 15 մետր հեռավորության վրա, այնինչ դա իրականությանը չի համապատասխանում: Վրաերթի ենթարկված թվով 35 ոչխարներից առաջին և վերջին ոչխարների հեռավորությունը եղել է 17 մետր: Արդյունքում ստացվել է այնպես, որ եթե առաջին ոչխարին վրաերթի ենթարկելու համար վարորդի մեղքը բացակայում է, ուրեմն առաջին ոչխարից 17 մետր հեռավորության վրա գտնվող ոչխարին վրաերթի ենթարկելու համար ևս վարորդի մեղքը բացակայում է:

Քննիչը ապացույցները գնահատել է կամայականորեն և միջոցներ չի ձեռնարկել պարզելու գործի բոլոր հանգամանքները: Վարույթն իրականացնող մարմինի կողմից չեն պարզվել, թե դեպքի պահին թվով 35 ոչխարներից յուրաքնաչյուրն ինչ հեռավորության վրա են գտնվել: Վրաերթի ենթարկված յուրաքանչյուր ոչխարի մասով վարորդի մեղքը պարզելու համար փորձագետին չեն առաջադրվել այն հարցը, թե վարորդի երթևեկության համար վտանգն առաջացած կետից վրաերթի ենթարկված ոչխարների միջև 32մ /15 +17/ տարածության առկայության պայմաններում վարորդն ունեցել է արդյոք ՃԵԿ-ի 67-րդ կետի պահանջը կատարելու և նշված հեռավորության վրա գտնվող ոչխարներից յուրաքանչյուրի նկատմամբ վրաերթը կանխելու տեխնիկական հնարավորություն: Արմավիրի քննչական բաժինը ինձ չի տեղեկացրել քրեական գործի քննությունը վերսկսելու մասին, նշված որոշման պատճենը ինձ չի ուղարկվել, այլ փոխարենը կատարել է թաքուն քննություն: Հարցաքննության են կանչել իրենց գործին խանգարող Կիրակոս Երիցյանին, որը հասկանալի պատճառով փոխել է հատուկ քննչական ծառայությունում տված իր ցուցմունքը և քրեական գործի վարույթը կրկին կարճել են:

Արդյունքում ես կրկին զրկվեցի իմ իրավունքների պաշտպանությունից և դատաավտոտեխնկական փորձաքնություն նշանակելու մասին միջնորդություն ներկայացնելու հնարավորությունից: Գործի քննության այդ փուլում անհրաժեշտություն էր առաջացել պարզելու համար, թե երթևեկության համար վտանգն առաջացած կետից մինչև վրաերթի ենթարկված ոչխարների միջև 32մ տարածության առկայության պայմաններում վարորդն ունեցել է արդյոք ՃԵԿ-ի 67-րդ կետի պահանջը կատարելու և նշված հեռավորության վրա գտնվող ոչխարներից յուրաքանչյուրի նկատմամբ վրաերթը կանխելու տեխնիկական հնարավորություն: Սակայն քննչական բաժնի ապօրինությունների պատճառով հնարավոր չի եղել պարզել այդ հանգամանքը: Մեր ընտանիքը գոյատևում էր ոչխարաբուծությունից ստացված եկամուտով, սակայն մեծահարուստ Տոնական Ղազարյանը զրկեց մեր գոյատևման հնարավորությունից: Հուսով եմ, որ Տոնական Ղազարյանի կապերը և հնարավորությունները չեն կարող ազդել արդարադատության վրա և ի վերջո արդարադատությունը կահաղթի»: