Միլիարդատեր Սորոսը նոր համաշխարհային պատերազմ է գուշակում

Ամերիկացի միլիարդատեր Ջորջ Սորոսը հնարավոր է համարել նոր համաշխարհային պատերազմը, որի սկիզբը կդնի Չինաստանի և ԱՄՆ-ի միջև հակամարտությունը: Այդ մասին, ինչպես տեղեկացնում է «Արմենպրես»-ը, գրել է Market Watch ռեսուրսը:

Սորոսի տեսակետով՝ նման սցենարը հնարավոր է, եթե ՉԺՀ-ն իր տնտեսությունը կողմնորոշի ներքին կարիքներին, այլ ոչ թե արտահանմանը: Այդ ժամանակ Չինաստանի իշխանություններին հարկավոր կլինի արտաքին հակամարտություն՝ իշխանությունը պահպանելու համար, կարծում է նա:

«Եթե ընդհարում տեղի ունենա Չինաստանի և ԱՄՆ-ի ռազմական դաշնակցի միջև, ինչպիսին Ճապոնիան է, չափազանցություն չի լինի ասել, որ մենք կհայտնվենք երրորդ համաշխարհային պատերազմի շեմին»,- մեջբերում է Սորոսի խոսքը Market Watch-ը:

Դրանից խուսափելու համար ԱՄՆ-ը պետք է «մեծ զիջում» անի Չինաստանին. յուանին թույլ տա դառնալու Արժույթի միջազգային հիմնադրամի (ԱՄՀ) արժութային զամբյուղի մի մասը: Չինական արժույթն այդ դեպքում կարող է լրջորեն մրցակցել դոլարի հետ, գրել է Market Watch-ը:

Չինաստանն ի պատասխան պետք է զիջի այն հարցում, որը վերաբերում է երկրի տնտեսության վերափոխմանը, նշել է միլիարդատերը: Նրա խոսքով՝ Չինաստանի և ԱՄՆ-ի համար դժվար կլինի համաձայնության հասնել, սակայն այլընտրանքը «շատ տհաճ է»:

Հակառակ դեպքում, ըստ Սորոսի, լուրջ վտանգ կա այն բանի, որ Չինաստանը քաղաքական և ռազմական դաշինք կստեղծի Ռուսաստանի հետ, և այդ ժամանակ նոր համաշխարհային պատերազմի սպառնալիքը կլինի իրական, հաղորդել է ՌԻԱ Նովոստին: