Միքայել Մելքումյանը ՀԾԿՀ-ում ուսումնասիրել է էլեկտրաէներգիայի թանկացման հայտը. մանրամասներ

Ազգային ժողովի ԲՀԿ խմբակցության պատգամավոր Միքայել Մելքումյանը Հանրային ծառայությունները կարգավորող հանձնաժողովում ուսումնասիրել է էլեկտրաէներգիայի սակագնի բարձրացման հայտը և եկել այն եզրահանգման, որ հիմնավորումները հիմնականում չեն տարբերվում նախորդ տարվա թանկացման հիմնավորումներից: «Առաջին հիմնավորումն ատոմակայանի աշխատանքի ոչ պլանային կանգն է: Ատոմակայանն ամեն տարի պլանային 45 օր չի աշխատում, իսկ դրանից դուրս աշխատանքի կանգն արդեն ոչ պլանային է: Վերջին երեք տարում մեր կլիմայական պայմանները հանգեցնում են նրան, որ մենք սակավաջուր տարի ենք ունենում, ինչի հետևանքով էլ հիդրոէներգետիկան քիչ էլեիտրաէներգիա է արտադրում»,- «Արմենպրես»-ի հաղորդմամբ՝ նշեց Մելքումյանը:

Նա նշեց, որ այս ամենի արդյունքում խախտվում են այն ծավալները, որոնք ամեն տարի պետությունը սահմանում է, թե որ աղբյուրից ՀԷՑ-ը ինչ ծավալի էլեկտրաէներգիա պետք է ստանա: «Հիմա մենք հասել ենք նրան, որ ջերմաէլեկտրակայաններից, որոնք ամենաթանկն են, ՀԷՑ-ը ձեռք է բերում 40 տոկոս էլեկտրաէներգիա, 30 տոկոս ատոմակայանից, 30 տոկոս էլ հիդրոէներգետիկան է մատակարարում: Սրա արդյունքում ներքին կշռված սակագինը հասնում է այնքան, որ ՀԷՑ-ը շահույթ չի ունենում և սկսում է պարտքեր կուտակել»,- ասաց Մելքումյանը:

Պատգամավորն այն կարծիքին է, որ ՀԷՑ-ի վնասները հարկավոր է փոխհատուցել, այլապես այն կարող է սնանկանալ: «ՀԷՑ-ի ծախսերի փոխհատուցմահ համար պետությունը կարող է ունենալ լուծումներ: Պետությունը կարող է փոխառու միջոցներ ներգրավել ՀԷՑ-ի գրավադրման հաշվին, այլ լուծումներ նույնպես կան, երբ բոլոր ռիսկերը դիվերսիֆիկացվում են արտադրող կայանների միջև, և միայն ՀԷՑ-ը չի կրում պատասխանատվություն, այլ թերմատակարարված էլեկտրաէներգիայի դիմաց պատասխան են տալիս բոլոր արտադրող կայանները»,- ասաց Մելքումյանը:

Նա ընդգծեց, որ հարկավոր է միջոցների ներգրավման եղանակով գնալ ՀԷՑ-ի վնասները փոխհատուցելու ճանապարով, սակայն այդ գործընթացին պետք է մասնակցեն նաև պետությունը և էլեկտրաէներգիա արտադրող կայանները: