Կանցկացվեն հայ-կիպրական համատեղ զորավարժություններ. Սեյրան Օհանյան

Հայ-կիպրական հարաբերությունները պաշտպանական ոլորտում հենված են բարեկամական հարաբերությունների, փոխադարձ աջակցության, պատրաստակամության և նաև ընդհանուր մոտեցումների հիմքի վրա: Տեսակետը ՀՀ ՊՆ Սեյրան Օհանյանինն է:

Կիպրոսի Հանրապետության ազգային պաշտպանության նախարար Խրիստոֆորոս Ֆոկաիդեսի հետ համատեղ ասուլիսի ժամանակ նախարար Օհանյանը նաև ընդգծեց, որ Կիպրոսի հետ լուրջ պայմանագրաիրավական հիմք է ստեղծված համագործակցության շրջանակում և այն իրականացվում է ամենամյա ծրագրի համաձայն: «Բանակցությունների ընթացքում մենք նշեցինք այն բոլոր ուղղությունները, որոնցում համագործակցելու ենք և դինամիկ ընթացք ենք տալու: Ստորագրեցինք 2015թ. համագործակցության պլանը, որը ներառում է ունեցած բոլոր ուսումնական վարժական փորձագիտական հնարավորությունները»,- ասաց նախարարը' հավելելով, որ կիպրացի գործընկերոջ այցը համապատասխան ընթացք կտա համագործակցությանը:

Սեյրան Օհանյանը նաև շեշտեց, որ հայ-կիպրական ռազմական և ռազմատեխնիկական համագործակցության շրջանակում ստեղծվել է միջպետական կառավարական հանձնաժողով: Շուտով կկայանա հանձնաժողովի երրորդ նիստը, որի ընթացքում կճշտվեն համագորածակցության բոլոր շրջանակները:

«Բացի միջպետական և պաշտպանական գերատեսչությունների միջև համագործակցության շրջանակից, խոսեցինք տարածաշրջանային և միջազգային անվտանգության խնդիրներից: Ընդհանուր առմամբ հանդիպումները թույլ են տալիս ևս մեկ անգամ արձանագրելու, որ ունենք միասնական մոտեցում, որի շրջանակում մեր համատեղ ջանքերն ուղղելու ենք հանուն միջազգային խաղաղության և կայունության ամրապնդման խնդիրներին»,- ասաց Սեյրան Օհանյանը:

Խրիստոֆորոս Ֆոկաիդեսը համատեղ քննարկումների շրջանակում առաջարկություն է արել վարժական համատեղ միջոցառումների շրջանակում անցկացնել համատեղ զորավարժություններ: Ի պատասխան՝ Օհանյանն ասել է, որ հայկական կողմն ընդունում է այդ գաղափարը, և մարտական ու օպերատիվ պատրաստության պատասխանատուներին հանձնարարություն է տրվել, որպեսզի ծրագրավորեն և որոշեն այն գործողությունների շրջանակը, որոնք իրականացվելու են: