Կուդրինը նախազգուշացրել է Ռուսաստանում ճգնաժամի վերահաս բարձրակետի մասին

Քաղաքացիական նախաձեռնությունների կոմիտեի (ՔՆԿ) ղեկավար, ՌԴ ֆինանսների նախկին նախարար Ալեքսեյ Կուդրինն այն կարծիքին Է, որ Ռուսաստանը լայնամասշտաբ ճգնաժամ Է ապրում, որի բարձրակետը դեռ առջևում Է: Այդ մասին, ինչպես տեղեկացնում Է «Արմենպրես»-ը, նա հունիսի 1-ին հայտարարել Է «Ինտերֆաքս» գործակալությանը տված հարցազրույցում:

Նրա խոսքով՝ արդյունաբերության առանձին ճյուղերում անկումը առավելագույն ցուցանիշների Է հասել 2008-2009 թվականներին:

ՔՆԿ-ի ղեկավարը կանխատեսում Է, որ 2015 թվականի երկրորդ եռամսյակում Ռուսաստանում ՀՆԱ-ի անկումը ավելի մեծ կլինի, քան առաջինում: «Այնուհետև իրադրությունը կհարթվի, և անկումը կանգ կառնի, բայց, այդուհանդերձ, ՀՆԱ-ն անկում կարձանագրի անցյալ տարվա համապատասխան ժամանակաշրջանների համեմատությամբ»,-ասել Է Կուդրինը:

Ընթացիկ տարում ՀՆԱ-ի անկումը կկազմի շուրջ 4 տոկոս, «այսինքն՝ փոքր-ինչ ավելի, քան պլանավորում Է տնտեսական զարգացման նախարարությունը»,-հավելել Է նա: «Բարդացնող գործոնների» թվում Կուդրինը նշել Է նավթի գինը և Ուկրաինայի իրադրությունը: Նրա խոսքով՝ «արժույթի փոխարժեքի տեսանկյունից իրադրությունը նույնիսկ ավելի վատ Է, քան վեց տարի առաջ»: Նա, մասնավորապես, նշել Է ձեռնարկություններում աշխատողների ազատումները, սպառողական ապրանքների գների աճը, եկամուտների անկումը:

Կուդրինի գնահատմամբ, «պահուստները կբավականացնեն ճգնաժամը առաջիկա երկու տարվա ընթացքում հաղթահարելու համար»: Նա նշել Է, որ «իշխանություններն ընդունել են շատ ծախսատար, բայց բանկերի աջակցման միանգամայն արդարացված միջոցներ»:

Վերստին հայտարարելով տնտեսության մեջ կառուցվածքային բարեփոխումներ իրականացնելու անհրաժեշտության մասին՝ նախկին նախարարը նշել Է, որ «իշխանությունների ինքնապահպանման բնազդը կգործի այն ժամանակ, երբ իրապես լուրջ խնդիրներ կստեղծվեն»: