Apple-ը ներկայացրել է իր գործառնական համակարգերի նորացված տարբերակները

Apple ընկերությունը ներկայացրել է իր բազային գործառնական համակարգերի նորացված և բարելավված տարբերակների մեծ լրակազմ: Ինչպես տեղեկացնում է «Արմենպրես»-ը, դրանք ցուցադրվել են Սան Ֆրանցիսկոյի Moscone West ցուցահանդեսային համալիրում հունիսի 8-ին բացված Apple-ի մշակողների ամենամյա համաշխարհային խորհրդաժողովում (Worldwide Developers C onference, или WWDC):

«Մենք շուկա ենք հանում երեք գործառնական համակարգերի՝ OS X - OS X El Capitan-ի, iOS - iOS 9-ի և WatchOS-ի նոր տարբերակները»,- հայտարարել է Apple-ի ղեկավար Թիմ Քուկը: Դրանք նախատեսված են համակարգիչների, շարժական կրիչների, ներառյալ սմարթֆոնների, և ընկերության նորագույն «խելացի ժամացույցների»՝ Apple Watch-ի համար: Այս բոլոր բարելավված ծրագրերն ամռան վերջից - աշնան սկզբից անվճար կտրամադրվեն Apple-ի համակարգերի տերերին:

Խորհրդաժողովում նաև հայտարարվել է ընկերության կողմից իր սեփական լրատվական ծառայության՝ Apple News-ի գործարկման մասին: Այն տրամադրում է խոշորագույն մեդիա հրատարակությունների ընթացիկ քաղաքական, տնտեսական և մշակութային տեղեկատվությանը ծանոթանալու հնարավորություն:

Ընկերությունն առանձնահատուկ ջանքեր է գործադրել հավելվածների հետագա զարգացման համար: «Կարող եմ հայտնել, որ Apple Store խանութներում ներբեռնված հավելվածների քանակն այժմ հասել է 100 միլիարդի»,- ասել է Թիմ Քուկը: Նա նշել է, որ առավել արագ զարգանում է Apple Watch-ի համար նախատեսված հավելվածների շուկան:

Apple-ի մշակողների ամենամյա համաշխարհային խորհրդաժողովի աշխատանքը կտևի մինչև հունիսի 12-ը, հաղորդել է ՏԱՍՍ-ը: