Կայացավ ՀՀ սփյուռքի նախարարության 21 քաղծառայողների երդման հանդիսավոր արարողությունը

Ապրիլի 11-ին կայացավ քաղաքացիական ծառայության մրցույթում հաղթող ճանաչված և սահմանված փորձաշրջանն անցած ՀՀ սփյուռքի նախարարության աշխատակազմի քսանմեկ քաղաքացիական ծառայողների երդման հանդիսավոր արարողությունը:

Միջոցառմանը ներկա էին ՀՀ սփյուռքի նախարար Հրանուշ Հակոբյանը, ՀՀ Ազգային Ժողովի նախագահի տեղակալ Էդուարդ Շարմազանովը, պատգամավորներ Գալուստ Սահակյանը, Արտակ Զաքարյանը, Մայր Աթոռ Սուրբ Էջմիածնի և ՀԲԸՄ Հայորդյաց տների հոգևոր տեսուչ-տնօրեն Կոմիտաս վարդապետ Հովնանյանը, արվեստի գործիչներ, գիտնականներ, սփյուռքահայեր, ուսանողներ և այլք:

Հնչեց ՀՀ պետական օրհներգը, որին հաջորդեց ՀՀ սփյուռքի նախարարության եռամյա գործունեության վերաբերյալ ֆիլմի ցուցադրությունը:

Ներկաներին ողջունեց և օրհնանքի խոսք հղեց Հայր Կոմիտաս վարդապետ Հովնանյանը: Բարի երթ մաղթելով երդման արարողության մասնակից քաղծառայողներին՝ Կոմիտաս վարդապետը կարևորեց նրանց դերը' որպես հայապահպանության սուրբ գործին ծառայելուն և Սփյուռքում ապրող հային իր Հայրենիքին՝ Հայոց սրբազան երկրին կապելուն կոչված «առաքյալներ»-ի:

Շնորհավորելով քաղծառայողներին՝ ՀՀ սփյուռքի նախարար Հրանուշ Հակոբյանն ընդգծեց պետական կառավարման այս նորաստեղծ կառույցում աշխատող քաղծառայողների մեծ պատասխանատվությունը մեր պետության և ազգի առջև: Նախարարը նաև նշեց, որ Սփյուռքում ապրող մեր հայրենակիցները կարող են վստահ լինլ, որ ի դեմս ՀՀ սփյուռքի նախարարության աշխատակիցների Հայրենիքում ունեն վստահելի և սրտացավ բարեկամներ: Այնուհետև Հ. Հակոբյանը քաղաքացիական ծառայողի վկայականներ հանձնեց ՀՀ սփյուռքի նախարարության աշխատակազմի երդման արարողությանը մասնակից քաղծառայողներին:

ԱԺ նախագահի տեղակալ Էդուարդ Շարմազանովը ևս շնորհավորեց քաղծառայողներին՝ նշելով, որ ՀՀ սփյուռքի նախարարության ստեղծումը Հայաստանի նորագույն պատմության ամենաառանցքային երևույթներից մեկն է: Շնորհակալություն հայտնելով նախարար Հ.Հակոբյանին և ՀՀ սփյուռքի նախարարության աշխատակիցներին' Է.Շարմազանովը պատրաստակամություն հայտնեց աջակցել Հայաստան-Արցախ-Սփյուռք եռամիասնության հզորացմանն ուղղված ՀՀ սփյուռքի նախարարության նախաձեռնություններին:

ԱԺ պատգամավոր Գ.Սահակյանը քաղծառայողներին մաղթեց, որ քաղծառայողի կոչումը պատվաբեր մի աստիճան դառնա նրանց հետագա գործունեության ընթացքում:

Քաղծառայողներին ողջունեցին և շնորհավորեցին նաև Հայրենիքում հաստատված սփյուռքահայեր Գերմանիայից, Իրաքից և այլ երկրներից:

Միջոցառումն իր գեղեցիկ կատարումներով եզրափակեց ՀՀ վաստակավոր արտիստ Ռուբեն Սահակյանը: