Երեք հազար բրիտանացիների մեդալներ կհանձնեն Էբոլա վիրուսի դեմ պայքարելու համար

Մեծ Բրիտանիայում այս ամռանը մեդալներ կհանձնեն թագավորության այն հպատակներին, ովքեր զգալի ավանդ են ներդրել Էբոլա վիրուսի հարուցած հիվանդության տարածման դեմ պայքարում: Ինչպես հայտնել են երկրի կառավարությունում, ընդամենն այդ պարգևին կարժանանա 3 հազար մարդ, տեղեկացնում է «Արմենպրես»-ը:

«Մեծապես բրիտանացի բժիշկների ու զինվորականների ջանքերի շնորհիվ մեզ հաջողվեց կանխել հիվանդության հետագա տարածումը,- հայտարարել է վարչապետ Դևիդ Քեմերոնը:- Այդ մեդալները նրանց վաստակի ճանաչումն են»:

Ներկայումս Սիեռա Լեոնեում են գտնվում հարյուրավոր բրիտանացի զինծառայողներ, ներառյալ զինվորական բժիշկներ և ծովային հետևակայիններ, որոնք հսկում են դաշտային հոսպիտալները: Անցյալ տարվա վերջին այդ երկիր է ժամանել թագավորական ռազմածովային ուժերի «Արգուս» նավը, որը սարքավորված է հիվանդներին ընդունելու համար:

2014 թվականի դեկտեմբերի 10-ին ամերիկյան Time հանդեսի խմբագրությունը «Տարվա մարդ» է ճանաչել Էբոլա վիրուսի տարածման դեմ պայքարող առողջապահության աշխատողի հավաքական կերպարը:

Էբոլա տենդի համաճարակը 2014 թվականի դեկտեմբերին սկսվել է Գվինեայում, որտեղից այնուհետև տարածվել է հարևան Լիբերիայի և Սիեռա Լեոնեի տարածքներ: Ընդամենն այդ երկրներում վտանգավոր հիվանդությունից մահացել է 11 հազար 154 մարդ, վարակվել է 27 հազար 219 բնակիչ, հաղորդել է ՏԱՍՍ-ը: