Պատգամավորները լիահույս են` Հայաստանը դեռ կարող է փոփոխություններ մտցնել ԵԽԽՎ-ի փաստաթղթում

ՀՀ Ազգային ժողովի խմբակցությունները հույս ունեն, որ ադրբեջանական նավթադոլարների քաղաքականությունը հաջողություն չի գրանցի և ԵԽԽՎ մոնիտորինգի հանձնաժողովի փաստաթղթում առկա՝ «Հայաստանն օկուպացրել է Լեռնային Ղարաբաղը» արտահայտությունը փոփոխության կենթարկվի: Այս մասին հայտնեցին խմբակցությունների ներկայացուցիչները լրագրողների հետ ճեպազրույցների ժամանակ: ՀՀԿ խմբակցության ղեկավար Վահրամ Բաղդասարյանը խորհուրդ տվեց չշտապել ու եզրակացություններ չանել ժամանակից շուտ՝ պատասխանելով հարցին՝ «Ով է թերացել, որ նման բան է տեղի ունեցել ԵԽԽՎ-ում»: «Ես թերացում չէի ասի, մենք նաև ունեցել ենք բավականին հաջողված բանաձևեր, բացի այդ' գործընթացը դեռ շարունակվում է, ինձ թվում է դա ավարտը չէ: Շարունակությունը տեսնելուց հետո, կանենք եզրակացություններ»,- «Արմենպրես»-ի փոխանցմամբ՝ ասաց պատգամավորը: Նա նշեց, որ Լեռնային Ղարաբաղի հարցի շուրջ տրամադրությունները տարբեր են, իսկ Հայաստանը հիմնվում է համանախագահների կարծիքների վրա:

Հնչած հարցին, թե գո՞հ եք արդյոք ԵԽԽՎ-ում հայաստանյան պատվիրակության ղեկավարի՝ ԱԺ փոխխոսնակ Հերմինե Նաղդալյանի կատարած աշխատանքից, Վահրամ Բաղդասարյանը պատասխանեց. «Մենք որևէ դժգոհություն չունենք, նա իր պարտավորությունները կատարում է իր և մեր պատվիրակության հնարավորությունների սահմաններում: Մենք ժամանակ ունենք ու պետք չէ շտապել գնահատականներ տալու առումով»:

ՀՅԴ-ական Աղվան Վարդանյանն ու «Ժառանգության» պատգամավոր Թևան Պողոսյանը նման արտահայտության գործածությունը կապում են ԵԽԽՎ-ում ադրբեջանամետ գործիչների առկայությամբ և կարծում են, որ մեր պատվիրակությունն աշխատելու տեղ ունի: «Վեհաժողովում ադրբեջանամետ շատ ուժեղ լոբբի է ձևավորվում, և Հայաստանն իր ուժերով չի կարող այն հաղթահարել»,- ասաց ՀՅԴ խմբակցության քարտուղար Աղվան Վարդանյանը՝ հավելելով, որ ադրբեջանական կողմին ձեռնտու չէ Մինսկի խմբի ձևաչափը, և նրանք նպատակ ունեն այն շրջանցելու: Աղվան Վարդանյանը վստահեցրեց' քանի դեռ հայկական կողմը կարողանում է պահպանել Մինսկի խմբի ձևաչափը, ապա նման բանաձևերը որևէ լուրջ հետևանքներ չեն կարող ունենալ:

«Այդ տեսակի ձևակերպումներ առաջին անգամ չէ, որ հնչում են տարբեր միջազգային փաստաթղթերում, պետք է կարողանանք պայքարել և աշխարհին բացատրել, թե ինչ իրավիճակ է տիրում Ադբեջանում ժողովրդավարության, մարդու իրավունքների, ԶԼՄ ներկայացուցիչների հանդեպ կիրառվող ճնշումների և այլ տեսանկյուններից»,- նշեց Թևան Պողոսյանը:

ԲՀԿ խմակցության քարտուղար Վահան Բաբայանն էլ հույս հայտնեց, որ ԵԽԽՎ-ում ՀՀ պատվիրակության բոլոր ներկայացուցիչներն անելու են ամեն ինչ, որ մեր երկրի շահերը պաշտպանված լինեն: «Ինչ վերաբերում է Ադրբեջանի խավիրարային քաղաքականությանը, նավթադոլարային ինտերվենցիային, նրանք փորձում են նմանատիպ բանաձևերի միջոցով դիվիդենտներ հավաքել: Վստահեցնում եմ, որ հայկական կողմը ուշի ուշով հետևում է նմանատիպ քայլերին և անում է աշխատանքներ, որ այդպիսի բաներ տեղի չունենան»,-նշեց Վահան Բաբայանը: «Իսկ ինչ ունի Հայաստանն Ադրբեջանի նավթադոլ արների փոխարեն» հարցին ի պատասխան' պատգամավորն ասաց. «Հայաստանն այնքան հզոր պետություն է՝ իր սփյուռքով, իր մտավոր կարողությամբ, իր հեղինակությամբ, որ երբեք այդ նավթադոլարները չեն խանգարել մեզ աշխարհում գրավել մեր տեղը, դրա վառ ապացույցն է Ղարաբաղյան պատերազմի ժամանակ մեր զբաղեցրած դիրքերը»:

ԵԽԽՎ մոնիտորինգի հանձնաժողովում ընդունվել է փաստաթուղթ, որում կա «Հայաստանն օկուպացրել է Լեռնային Ղարաբաղը» արտահայտությունը, այն քվեարկության է դրվելու հունիսի 22-26-ին տեղի ունենալիք ԵԽԽՎ ամառային նստաշրջանում և հավանության արժանանալու դեպքում դառնալու է բանաձեւ։