ՍԴՀԿ 20 հայ գործիչների դատավարության արխիվները Թուրքիայում են

Լիբանանի խորհրդարանի նախկին անդամ Եղիկ Ջերեջյանը հավաստիացնում է, որ հատկապես Հայոց ցեղաս պանության 100-րդ տարելիցին Օսմանյան կայսրությունում կախաղան բարձրացված ՍԴՀԿ 20 քաղաքական գործիչների պատմության քննարկումը կարեւոր է եւ արդիական: «Արմենպրես»-ի հետ զրույցում Ջերեջյանը շեշտում է, որ այս թեմայի առնչությամբ ուսումնասիրությունները բավարար չեն, հետեւաբար թե՛ քաղաքագետները, թե՛ պատմաբանները բավական լուրջ անելիք ունեն:

«Փորձում ենք այս նյութի շուրջ նոր գիտական խոսք ասել, տարբեր դիտարկումներ կատարել: Երեւույթը, որ Հայոց ցեղասպանության հետ է շաղկապված, նաեւ քաղաքական առումով յուրահատկություններ ունի, որը պետք է փորձենք բարձրաձայնել: Մինչ այսօր լուրջ մոտեցում չենք ցուցաբերել այս թեմային: Սա առաջին փորձն է, եւ սրանով է պայմանավորված այսօվա գիտաժողովի արդիականությունը»,- ասաց Ջերեջյանը' հավելելով, որ թեման, ցավոք, լիովին բացահայտված չէ:

«Սփյուռքում այս պատմության մասին ավելի շատ գիտեն, քան Հայաստանում: Ցավոք, թեման բացահայտված չէ: Եւ քայլ առ քայլ, նման առիթներով մեր քաղաքական եւ պատմագիտական միտքը պետք է կարողանա բացահայտել այն եւ ներկայացնել ժողովրդին»,- ասաց Ջերեջյանը:

Լիբանանահայ քաղաքական գործիչը շեշտում է, որ 20 գործիչների մահապատժին վերաբերող դատական նյութերը գտնվում են Թուրքիայում: Թեպետ 2006թ. թուրքական կողմը հրապարակել է արխիվը, սակայն Ջերեջյանը վստահ է, որ այն թերի է տպագրված:

«ՍԴՀԿ գործիչների նախաձեռնած վերջին ժողովի վերաբերյալ, որի պատճառով 20 գործիչները կախաղան հանվեցին, արխիվ չկա: Պահպանվել են գործիչների նամակները: Այդ նամակների մեծ մասը գտնվում է ՍԴՀԿ կուսակցության արխիվում' Բեյրութում: Մի մասն էլ Ազգային արխիվում»,- ասաց Ջերեջյանը' հավելելով, որ ժամանակն է համադրել արխիվներն ու ամբողջական աշխատություն ստեղծել 20 հայ գործիչների պատմության վերաբերյալ:

ՀՀ ԳԱԱ-ում կայացել է ՍԴՀԿ 20 գործիչների նահատակության 100-րդ տարելիցին նվիրված միջազգային գիտաժողով: