ԵԱՏՄ-ին Ղրղզստանի անդամակցության համաձայնագրին Հայաստանը կմիանա առանձին արձանագրությամբ

Եվրասիական տնտեսական միությանը Ղրղզստանի անդամակցության պայմանագրին Հայաստանը կմիանա առանձին արձանագրությամբ: Հայաստանի խորհրդարանը քննարկում է 2015 թվականի մայիսի 8-ին Մոսկվայում ստորագրված «Ղրղզստանի Հանրապետության' «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին» 2014 թվականի դեկտեմբերի 23-ին ստորագրված պայմանագրին Հայաստանի Հանրապետության միանալու մասին» արձանագրությունը: Հիմնական զեկուցող, ՀՀ միջազգային տնտեսական ինտեգրման և բարեփոխումների նախարարի առաջին տեղակալ Սուրեն Կարայանը նշեց, որ Եվրասիական տնտեսական միության կանոնադրության մեջ սահմանված է, որ միությանը Հայաստանի անդամակցության պայմանագրի ուժի մեջ մտնելուց հետո մինչ այդ միության կողմից ստորագրված համաձայնագրերին Հայաստանը պետք է միանա առանձին արձանագրություններով:

«Քանի որ Եվրասիական տնտեսական միությանը Հայաստանի անդամակցության պայմանագիրն ուժի մեջ է մտել 2015թ. հունվարի 2-ին, իսկ միությանը Ղրղզստանի անդամակցության պայմանագիրը ստորագրվել է 2014թ. դեկտեմբերի 23-ին, անհրաժեշտություն է առաջացել, որպեսզի Հայաստանն այս համաձայնագրին միանա առանձին արձանագրությամբ»,- «Արմենպրես»-ի հաղորդմամբ՝ նշեց Կարայանը:

Հայաստանը Եվրասիական տնտեսական միությանն անդամակցելու պայմանագիրը ստորագրել է 2014թ. հոկտեմբերի 10-ին: ԵԱՏՄ-ին Հայաստանի անդամակցության պայմանագիրն ուժի մեջ է մտել 2015թ. հունվարի 2-ին: Պայմանագրի կնքումից մինչև դրա ուժի մեջ մտնելու ժամկետը ԵԱՏՄ-ի կողմից ստորագրված համաձայնագրերին Հայաստանը պետք է միանա առանձին արձանագրությամբ: