Թբիլիսիում ջրհեղեղից հետո Վրաստանն ամեն տեսակ օգնության կարիք ունի. ԱԳՆ

Վրաստանի արտաքին գործերի նախարար Թամարա Բերուչաշվիլին հայտարարել է, որ երկիրը Թբիլիսիում տարերային աղետից հետո բազմաթիվ առաջարկություններ է ստանում հումանիտար, ֆինանսական, փորձագիտական օգնության վերաբերյալ, և նշել է, որ Վրաստանն ամեն տեսակ օգնության կարիք ունի, տեղեկացնում է «Արմենպրես»-ը:

Կարկուտով և քամիով ուղեկցվող տեղատարափը Թբիլիսիում մոլեգնել է լույս հունիսի 14-ի գիշերը: Դրա հետևանքով վնասվել են բնակելի շենքեր, ճանապարհներ, ենթակառուցվածքի օբյեկտներ: Թբիլիսիի քաղաքագլուխ Դավիթ Նարմանիան հայտնել է 12 զոհվածների մասին, սակայն վրացական ԶԼՄ-ները ժամ առ ժամ հայտնում են գտնված նոր զոհերի մասին: Ավելի քան 260 մարդ անօթևան է մնացել, 24 բնակիչ անհետ կորած է համարվում: Ավերվել է կենդանաբանական այգին, որտեղից փախել են 30-ից ավելի գիշատիչ, այդ թվում՝ գայլեր, առյուծներ, արջեր, սատկել է 300-ից ավելի կենդանի: Տարերքի պատճառած վնասը գերազանցում է 20 մլն դոլարը:

«Վրաստանը համերաշխության, զորակցության, ցավակցության հաղորդագրություններ է ստանում մեր գործընկերներից, բարեկամ երկրներից՝ վարչապետների, նախագահների ու սովորական քաղաքացիների մակարդակով: Եվրամիության արտակարգ իրավիճակների կառավարման խորհուրդը լիակատար կոորդինացում է իրականացնում Վրաստանի համապատասխան գերատեսչությունների հետ և անհրաժեշտության դեպքում պատրաստ կլինի օգնություն ցուցաբերել, որն այժմ այնքան անհրաժեշտ է Վրաստանին: Վրաստանի արտաքին գործերի և ֆինանսների նախարարություններն աշխատում են, որպեսզի հնարավորինս շուտ մոբիլիզացվի ֆինանսական օգնությունը դոնորական կազմակերպություններից ու գործընկերներից»,- ասել է Բերուչաշվիլին «Ռուսթավի-2» հեռուստաընկերության եթերում:

Վրաստանի ԱԳ նախարարի խոսքով՝ հանրապետությունը պատրաստ է ընդունելու ամեն տեսակ օգնություն, այդ թվում՝ փորձագիտական, տարերային աղետի հետևանքները հաղթահարելու համար: «Խոսքն ամեն տեսակ օգնության մասին է, Վրաստանին ու Թբիլիսիին օգնություն է անհրաժեշտ այժմ, այս րոպեներին: Բայց դրա հետ միասին մենք աշխատում ենք միջազգային մակարդակով փորձագիտական օգնության կազմակերպման ուղղությամբ, որպեսզի կանխվեն նման հետևանքները»,- հավելել է Բերուչաշվիլին, հաղորդել է ՌԻԱ Նովոստին: