ԱՄՆ-ում Քըրք Քըրքորյանի հիշատակը կհարգեն հոգեհանգստի հատուկ արարողություններով

Մեծի Տանն Կիլիկիո ԱՄՆ Արևմտյան թեմի ազգային առաջնորդ գերաշնորհ սրբազան Մուշեղ արքեպիսկոպոս Մարտիրոսյանի առաջնորդությամբ հունիս 21-ին թեմի բոլոր եկեղեցիներում սուրբ պատարագի ընթացքում հոգեհանգստյան արարողություն կկատարվի հայազգի միլիարդատեր Քըրք Քըրքորյանի հոգու հանգստյան համար: Ինչպես հաղորդում է «Արմենպրես»-ըˋ վկայակոչելով «Ասպարեզ» պարբերականը, Առաջնորդ սրբազանը սուրբ պատարագ կմատուցի Ֆրեզնոյի Սուրբ Երրորդություն մայր եկեղեցում և կկատարի նոր սրբանկարի օրհնություն:

«Մեր հավատացյալ ժողովրդին հրավիրում ենք միանալու հիշատակի արարողություններին և աղոթք հղելու հայրենանվեր ու ազգանվեր բարերարի հոգու խաղաղության համար»,- նշված է Ազգային առաջնորդարանի դիվանին հղած հաղորդագրությունում։

98 տարեկանում կյանքից հեռացել է ամերիկահայ գործարար, միլիարդատեր, բարերար Քըրք Քըրքորյանը: Մահվան բոթը հաստատել է Քըրքորյանի «Տրասինդա Քորփորեյշնի» նախագահ և գործադիր տնօրեն Էնթոնի Մանդեկիքը: Քըրքորյանը մահացել է երկուշաբթի երեկոյան՝ Բեվերլի Հիլլզի իր տանը:

Քըրք Քըրքորյանը ծնվել է 1917թ. հունիսի 6-ին Ֆրեզնո քաղաքում: Զբաղվել է հյուրանոցային շինարարությամբ, կինո և ավտոմոբիլային արտադրությամբ: Սպիտակի երկրաշարժից հետո և ՀՀ շրջափակման ու տնտեսական ճգնաժամի տարիներին «Հայաստան» համահայկական հիմնադրամի տարբեր ծրագրերին նվիրաբերել է ավելի քան 20 մլն դոլար: 1996թ. կրկնապատկել է Լոս Անջելեսի հեռուստամարաթոնի ընթացքում հավաքած գումարը' Գորիս-Ստեփանակերտ ավտոճանապարհի շինարարությանը հատկացնելով մոտ 4 մլն դոլար: 2001-ից նրա «Լինսի» հիմնադրամը 200 մլն դոլարի արժողության ծրագրեր է իրականացրել ՀՀ-ում ավտոճանապարհների վերակառուցման, մշակութային հաստատությունների նորոգման, աղետիգոտու վերականգնման ուղղությամբ: Հայաստանի Ազգային հերոս է: Պարգևատրվել է «Հայրենիք» շքանշանով: