Հայաստանը կայուն գործընկեր է թե ՀԱՊԿ-ի, թե ՆԱՏՕ-ի համար. քաղաքագետ

Հայաստանի զինված ուժերն ամենաքիչ կոռումպացվածն է նախկին հետխորհրդային երկրների զինված ուժերի ցանկում եւ սա նախապայման է պաշտպանական բարեփոխումներ իրականացնելու համար: Տեսակետը Տարածաշրջանային հետազոտությունների կենտրոնի տնօրեն Ռիչարդ Կիրակոսյանինն է: «Արմենպրես»-ի փոխանցմամբ' ՆԱՏՕ-ի խորհրդարանական վեհաժողովի Ռոուզ Ռոթ սեմինարի ժամանակ Կիրակոսյանն ասաց, որ տարիների ընթացքում Հայաստանը լուրջ առաջընթաց է գրանցում հենց պաշտպանական կառույցում: «Առաջին հերթին կցանկանայի շեշտել պաշտպանության ոլորտում պրոֆեսիոնալիզմը: Ռազմական կրթության առումով Հայաստանը լուրջ առաջընթաց է գրանցել: Սա շատ կարեւոր է հատկապես հոգեբանական տեսանկյունից, ինչը ենթադրում է մուտքը խորհրդային կարգերից դեպի նոր դարաշրջան»,- ասաց նա:

Քաղաքագետն առանձնակի կարեւորում է Հայաստանի մասնակցությունը խաղաղապահ առաքելությանը: Այս առումով Հայաստանը կարող է ապացուցել, որ անվտանգություն ստեղծող պետություն է: «Հայաստանը դադարել է լինել անվտանգություն սպառող պետություն: Այժմ Հայաստանն է անվտանգություն ստեղծում: Բայց ես կասեի, որ Հայաստանի փոխակերպումն առաջ է գնացել ոչ միայն անվտանգություն ստեղծողի դերով, այլ որպես կայուն գործընկեր' ինչպես ՀԱՊԿ-ի, այնպես էլ ՆԱՏՕ-ի համար»,- ասաց Կիրակոսյանը' հավելելով, որ Հայաստանը փորձում է պաշտպանական համագործակցության ոլորտում պահպանել հավասարակշռություն:

Երևանում ՆԱՏՕ-ի խորհրդարանական վեհաժողովի և ՀՀ ԱԺ համագործակցությամբ' հունիսի 18-20-ին անց է կացվում «Անվտանգությունն ու կայունությունը Հարավային Կովկասում. տեւական խաղաղության խթանումը տարածաշրջանում» խորագրով Ռոուզ Ռոթ 89-րդ սեմինարը: Սեմինարի առանցքում են այնպիսի թեմաներ, ինչպիսիք են Հայաստանի համագործակցությունը եվրաատլանտյան համայնքի հետ, միջնորդության դերը Լեռնային Ղարաբաղի հակամարտությունում, բարեվարքության հաստատումն իբրեւ ՀՀ-ում պաշտպանական բարեփոխումների մաս, ինչպես նաև ՆԱՏՕ-ի գործընկերությունը Հարավային Կովկասում: