ԵՄ-ն կաջակցի Հայաստանում քաղաքացիական ծառայության բարեփոխումներին

ՀՀ քաղաքացիական ծառայության խորհրդի նախագահ Մանվել Բադալյանն ընդունել է ԵՄ-ի և Տնտեսական համագործակցության և զարգաց­ման կազմակերպության (OECD) համատեղ նախաձեռնությունը հանդիսացող SIGMA ծրագրի հանրային ծառայության և մարդկային ռեսուրսների կառավարման հարցերով ավագ խորհրդատու Քսաֆիեր Սիստերնային: Հանդիպման նպատակն էր քննարկել ԵՄ-ի կողմից Հայաս­տանին ցուցաբերվելիք բյուջետային աջակցության ծրագրի քաղաքացիական ծառայության համակարգի արդիականացման բաղադրիչից բխող բարեփո­խում­ներին ՍԻԳՄԱ-ի կողմից ցուցաբերվելիք հնարավոր աջակցության շրջանակները: Այս մասին «Արմենպրես»-ին տեղեկացրին ՀՀ քաղաքացիական ծառայության խորհրդի մամուլի ծառայությունից:

Արժևորելով անցած տարիներին ՀՀ ՔԾԽ-ի և SIGMA-ի սերտ համա­գոր­ծակցության արդյունքները' պարոն Բադալյանը նշել է, որ ներկա փուլում համակարգն ունի երկու հիմնական առաջնահերթություն, որոնց շրջանակ­ներում SIGMA-ից ակնկալվում է ամենօրյա ռեժիմով մեթոդական և փորձա­գիտա­կան աջակցություն: Առաջինը քաղաքացիական ծառայողների արդյունավե­տության գնահատման նոր մոդելի ներդրումն է, որը մի կողմից կապվելու է նրանց ֆինանսական խրախուսման և կարիերային առաջ­խաղացման, իսկ մյուս կողմից' շարունակական ուսուցման վրա: Երկրորդը համակարգի կադրային համարման գործող կառուցակարգերի կատարելա­գործումն է' վարչական և մասնագիտական պաշտոնների հստակ դասակարգման, արժանիքների, մարդկային ու մասնագիտական որակների բացահայտման վրա խարսխելու նպատակով:

Սիստերնան նշել է, որ հատկապես այս ուղղություններով բարեփո­խումների իրականացումը ցանկացած երկրի համար բարդագույն հիմնահարց է' փոխանցելով դրանց հետ կապված ՀՀ ՔԾԽ-ին օգնելու ՍԻԳՄԱ-ի պատրաստակամությունը:

Քննարկումների արդյունքում պայմանավորվածություն ձեռք է բերվել շրջանակային պայմանագրի հիման վրա ՀՀ ՔԾԽ գործուղել եվրոպական փորձագետների' ԵՄ անդամ երկրների լավագույն փորձի, չափորոշիչների համատեղ ուսումանսիրման, փոփությունների հնարավոր ռիսկերի գնահատ­ման և ախտորոշման հարցում ՀՀ ՔԾԽ-ին աջակցելու նպատակով: