Գերմանական թերթը Ադրբեջանում քաղաքացիների ծանր կյանքի պայմանների մասին

Բաքվում անցկացվող Եվրոխաղերին հետեւող արտասահմանցի լրագրողները, մրցումներից բացի, անդրադառնում են նաեւ Ադրբեջանի մայրաքաղաքի բնակիչների ծանր կյանքի պայմաններին:

Ինչպես հաղորդում է «Արմենպրես»-ը, գերմանական Frankfurter Allgemeine թերթի աշխատակից Քրիստոֆ Բեքերը «Բաքվի փայլի հետեւի աղքատությունը…» վերնագրով հոդվածում գրում է Եվրոխաղերի վրա 8 մլրդ դոլար ծախսած Ադրբեջանում քաղաքացիների ծանր կացության մասին:

Հոդվածում գերմանացի լրագորղը գրում է, որ Իլհամ Ալիեւը մեկ տարում իր ժողովրդին տված թոշակների եւ աշխատավարձերի կրկնակին ծախսել է Եվրոխաղերի վրա: Իսպանական մամուլը Բաքվում անցկացվող Եվրոխաղերը «դիկտատուրայի պրոպագանդա» է անվանել: Փայլփլուն Բաքու հազարավոր մարզիկներ են հրավիրվել Ադրբեջանի ավտոկրատ կերպարը ցուցադրող Եվրոխաղերին: Միայն Եվրոխաղերի բացման արարողության վրա Ադրբեջանը 100 մլն դոլար է ծախսել:

«Եվրոխաղերի բացման արարողությունից երեք օր հետո եղա փայլփլուն Բաքվի կենտրոնից դուրս վայրում, որտեղ փորման աշխատանքներ էին տարվում, եւ շուրջը կատարյալ աղտոտություն էր տիրում: Ամենուրեք աղբ էր թափված: Շրջակա որոշ վայրերում նավթ էր հոսում: Անտանելի վատ հոտ էր փչում: Այդտեղից մոտ 200 մ հեռավորությամբ գտնվող բնակելի տների մոտ երեխաները ֆոտբոլ էին խաղում: Աղքատ մարդիկ աղբանոցներում ինչ-որ բան էին փնտրում: Մենք չէինք կարող այնտեղ երկար մնալ, քանի որ եթե իմանային մեր այնտեղ գտնվելու մասին, իշխանությունների հետ խնդիրներ կունենայինք: Մարզիկների ավաններում ամեն ինչ փայլում է, իսկ քիչ այն կողմ' հին, կիսաքանդ, կեղտոտ շենքեր են եւ աղքատություն», -գրում է թերթը:

Հոդվածում Քրիստոֆ Բեքերը մեջ է բերել 2013 թվականի նախագահական ընտրություններում Ալիեւի գլխավոր մրցակից Ջամիլ Հասանլիի խոսքն այն մասին, որ Եվրոխաղերի վրա ծախսված յուրաքանչյուր մանաթը կարող էր ծախսվել քաղաքացիների կենսամակարդակը բարելավելու վրա:

Նա նշել է, որ «Ազատություն» ռադիոկայանի աշխատակցուհի Խադիջա Իսմայիլովան, ով ներկայում կալանավորված է, ավելի վաղ անցկացրած լրագրողական հետազոտության արդյունքում պարզել է, որ Ալիեւները 48 մլրդ դոլար են դուրս բերել երկրից եւ տեղակայել օֆշորի իրենց բանկային հաշիվներում:

«Ադրբեջանի կենտրոնական ընտրական հանձնաժողովը նախագահական ընտրությունները դեռեւս չավարտված հայտարարել էր Ալիեւի 72 տոկոս ձայներով հաղթանակ տանելու մասին: Ադրբեջանի բանտերում ներկայում Ալիեւի ռեժիմին դեմ հանդես եկած ավելի քան 80 քաղբանտարկյալ կա: Ադրբեջանում Հեյդար Ալիեւի պաշտամունք է ստեղծվել. ամենուրեք նրա արձաններն են, նրա անունով կենտրոններ, պողոտաներ, օդանավակայան…Ադրբեջանը գնում է դեպի Հյուսիսային Կորեա», -նշում է հոդվածագիրը:

Գերմանական թերթը մեջ է բերել նաեւ իսպանական El Mundo թերթի հրապարակումից հատված, որում ասվում է, որ մի շարք միջազգային կազմակերպություններ Եվրոխաղերը անվանել են Ալիեւի «դիկտատուրայի պրոպագանդա»: