Դաունի սինդրոմով Լեոյի մայրը հավաստիացնում է. ընտանիք վերադառնալու պատճառը գումարը չի եղել

Դաունի համախտանիշով ծնված Լեո Ֆորեսթի մայրըˋ Ռուզաննա Բադալյանը, TV3's 3D հեռուստահաղորդման ժամանակ հավաստիացրել է, որ ամուսնու և որդու մոտ վերադառնալու իր որոշման պատճառը 500 հազար դոլարը չէ: Ինչպես հաղորդում է «Արմենպրես»-ըˋ վկայակոչելով նորզելանդական stuff.co.nz կայքը, Ռուզաննա Բադալյանը վերադարձել է ընտանիք, և բոլոր երեքը ներկայումս բնակվում են Նոր Զելանդիայում:

Լեո Ֆորեսթը ծնվել է Հայաստանում 2015 թվականի հունվարի 21-ինˋ նորզելանդացի հորˋ Սամուել Ֆորեսթի և հայազգի մորˋ Ռուզաննա Բադալյանի ընտանիքում: Տեղեկանալով որդու մոտ հայտնաբերված համախտանիշի մասինˋմայրը հրաժարվել էր նրանից, իսկ հայրը որոշել նրան տեղափոխել Նոր Զելանդիա ու հոգ տանել փոքրիկի մասին: Երեխայի բուժման ծախսերը հոգալու նպատակով Սամուել Ֆորեսթը նախաձեռնել էր «Bring Leo Home» անվանումով դրամահավաքը, որի շնորհիվ նախատեսված 60 հազար դոլարի փոխարեն հավաքվել էր ավելի քան 500 հազար դոլար:

Stuff.co.nz-ը նշում է, որ դրամահավաքի մեծ հաջողությունից հետո Ռուզաննա Բադալյանը վերադարձել է ամուսնու և երեխայի մոտ՝ ասելով, որ կարոտել է իր երեխային: TV3's 3D հեռուստահաղորդմանը տված հարցազրույցի ժամանակ Բադալյանը հավաստիացրել է, որ «գումարը որևէ նշանակություն չունի իր համար» և դա պատկանում է իր որդուն և ոչ թե իրեն: Նույն հաղորդման ժամանակ Սամուել Ֆորեսթը հայտնել է, որ գումարը ներդրվել է Լեոի համար բացված ավանդում, և ինքն այդ գումարներից օգտվելու իրավասություն ու հնարավորություն չունի:

Երեխայի հայրը հույս է հայտնել, որ մարդիկ կհասկանան, թե որքան մեծ քայլ էր Բադալյանի համար ընտանիք վերադառնալը: «Ես ցանկանում եմ, որ մարդիկ հասկանան, որ նա իսկապես լավ մարդ է»,- ասել է Սամուել Ֆորեսթը:

Կայքի փոխանցմամբˋ Լեոյի հայրիկը կատարել է նվիրատվությունների միջոցով հավաքված գումարով նույն համախտանիշն ունեցող Հայաստանի մյուս փոքրիկներին օգնելու իր խոստումը և գումարի մի մասը փոխանցել է Հայաստանի երեխաներին: