ՀԾԿՀ-ը կարգավորումներ է կատարում հաղորդակցության ոլորտի սակագներում և փաթեթներում

Հանրային ծառայությունները կարգավորող հանձնաժողովը կարգավորում է էլեկտրոնային հաղորդակցության ցանցերի օպերատորների աշխատանքը' սահմանելով փաթեթներ և սակագնային պլաններ: «Արմենպրես»-ի փոխանցմամբ' ՀԾԿՀ նիստի ժամանակ հանձնաժողովի հեռահաղորդակցության վարչության պետ Գևորգ Գևորգյանը նշեց, որ որոշման համար հիմք է ծառայել այն, որ օպերատորների կողմից առաջարկվող ծառայությունների փաթեթների և սակագնային պլանների զանազանությունը նպաստում է օպերատորների միջև մրցակցության զարգացմանը և էլեկտրոնային հաղորդակցության ծառայությունների մատչելիության ապահովմանը:

«Որոշմամբ սահմանվել է, որ սակագնային պլանն օպերատորի հրապարակային առաջարկն է, որը սահմանում է մեկ կամ մի քանի տեսակի ծառայությունից, այդ թվում' փաթեթներից օգտվելու սակագներ, իսկ փաթեթը ներառում է մեկ կամ մի քանի տեսակի ծառայություն՝ քանակային ցուցանիշի կամ օգտագործման ժամկետի սահմանափակմամբ»,- ասաց նա:

Որոշմամբ սահմանվել է, որ սակագնային տարբեր պլաններ կարող են նախատեսել միևնույն կամ տարբեր ծառայություններից, այդ թվում' փաթեթներից տարբեր սակագներով օգտվելու հնարավորություն: Սակագնային պլանի մեջ ներառված փաթեթների սահմաններում մատուցված ծառայությունների ընդհանուր խմբաքանակի դիմաց օպերատորը գանձում է այդ սակագնային պլանի համար սահմանված սակագինը (բաժանորդավճարը):

Այսուհետ, փաթեթի մեջ ներառված յուրաքանչյուր ծառայության մեկ միավորի համար սակագին չի սահմանվում, իսկ յուրաքանչյուր փաթեթի ակտիվացման պահից դրանով սահմանված ժամկետների և ծավալների սահմաններում մատուցված ծառայությունների ընդհանուր խմբաքանակի համար օպերատորը գանձում է այդ փաթեթի համար սահմանված սակագինը:

Գևորգյանը նաև տեղեկացրեց, որ օպերատորները հաշիվների վարման համակարգում հաշվառում են փաթեթները՝ ըստ դրանց համար սահմանված սակագների, իսկ փաթեթներից դուրս մատուցված ծառայությունները՝ ըստ ծավալի և համապատասխան սակագնի: