Հայաստանում մեկնարկեց երկրաշարժի ժամանակ ճգնաժամային հաղորդակցության ուսումնավարժությունը

ՀՀ տարածքային կառավարման և արտակարգ իրավիճակների նախարարության ճգնաժամային կառավարման պետական ակադեմիայում հուլիսի 7-ին մեկնարկեց «Հայաստանի Հանրապետությունում աղետների ժամանակ (ուժեղ երկրաշարժ) ճգնաժամային հաղորդակցության և հանրային իրազեկման կազմակերպումը» թեմայով շտաբային ուսումնավարժությունը: «Այս ուսումնավարժությանը մասնակցելու են գրեթե բոլոր նախարարություն-գերատեսչությունների, մարզպետարանների, միջազգային ու հասարակական կազմակերպությունների և խոշոր մասնավոր ընկերությունների լրատվական ծառայությունների ղեկավարները: Բացի այդ այս ուսումնավարժության ընթացքում առաջին անգամ գործարկվելու է աղետների ժամանակ ծավալվող միացյալ միջգերատեսչական լրատվական կենտրոնը, որի հիմնական նպատակն է աղետի դեպքում ժամանակին ու հավաստի տեղեկատվությամբ ապահովել բնակչությանը և կառավարման մարմիններին'կանխելով խուճապի ու ասեկոսեների տարածումը»,-«Արմենպրես»-ի հաղորդմամբ' լրագրողների հետ զրույցում հայտնեց ՀՀ ՏԿԱԻՆ փրկարար ծառայության տնօրենի տեղակալ, գեներալ-մայոր Նիկոլայ Գրիգորյանը:

Նա նշեց, որ ուսումնավարժության սցենարի համաձայն' տեղի է ունեցել ուժեղ երկրաշարժ, որի հետևանքով կան բազմաթիվ զոհեր, տուժածներ և անօթևան մարդիկ: «Ուսումնավարժության ընթացքում մենք ստեղծելու ենք «թեժ գիծ», գործելու է հատուկ կայքէջ, «աղետի գոտուն» կից ծավալվելու է նաև շարժական լրատվական կենտրոն, որը «դեպքի վայրում» ապահովելու է լրատվամիջոցների աշխատանքը: Ի վերջո այս ճգնաժամային ուսումնավարժության գլխավոր նպատակն է որոշել, թե աղետների դեպքում արդյոք քանի րոպե հաճախականությամբ պետք է տրվի տեղեկատվություն, որոնք են տեղեկատվության թիրախները և տեղեկատվության փոխանցման խողովակները, և ինչպես պետք է աշխատեն միջգերատեսչական լրատվական կենտրոնը ու շարժական լրատվական կենտրոնը դեպքի վայրում»,- շեշտեց Նիկոլայ Գրիգորյանը:

Հունիսի 2-3-ը ՀՀ ՏԿԱԻ նախարարությունը և Հայաստանում ԱՄՆ դեսպանության ռազմական համագործակցության գրասենյակը անցկացնում են «Հայաստանի Հանրապետությունում աղետների ժամանակ (ուժեղ երկրաշարժ) ճգնաժամային հաղորդակցության և հանրային իրազեկման կազմակերպումը» թեմայով աշխատաժողով: Ընդգրկված են ՀՀ բո լոր նախարարություն-գերատեսչությունների, մարզպետարանների, միջազգային և հասարակական կազմակերպությունների, խոշոր մասնավոր ձեռնարկությունների, զանգվածային լրատվամիջոցների ներկայացուցիչներ: Հայ և ամերիկացի փորձագետները կանդրադառնան ԱԻ՝ ռիսկի և ճգնաժամային լրատվության սկզբունքներին ու առանձնահատկություններին, միջգերատեսչական միացյալ լրատվական կենտրոնի կազմավորմանը, ուժեղ երկրաշարժի դեպքում բնակչության պաշտպանության պլանին և այլ օգտակար թեմաների: