Սիրիայում ԻՊ-ի շարքերում մոտ հազար ադրբեջանցի է կռվում. Օրուջլու

Հայտնի է դարձել «Իսլամական պետություն» (ԻՊ) խմբավորման կազմում Սիրիայում կառավարական ուժերի դեմ կռվող Ադրբեջանի քաղաքացիների մոտավոր թիվը:

Ինչպես հաղորդում է «Արմենպրես»-ը, Ադրբեջանի «Արեւելք-Արեւմուտք հետազոտական կենտրոնի ղեկավար Արաստուն Օրուջլուն, հենվելով սեփական ուսումնասիրությունների եւ ադրբեջանական ԶԼՄ-ների հրապարակումների վրա, «Ազատություն» ռադիոկայանին հայտնել է, որ այդ թիվը տատանվում է 600-ից 1000-ի միջեւ:

«Դա Ադրբեջանի համար լուրջ թիվ է: Աշխարհում մուսուլմանների թիվը 1,5 մլրդ է: Նման մարդկանց իրենց երկրներ վերադարձը խիստ վտանգավոր է: Նրանք կարող են կապ պահպանել ահաբեկչական կազմակերպությունների հետ, ձեռք բերել զենք եւ զինամթերք եւ դրանք օգտագործել պետության դեմ: Այդ մարդիկ մտադիր չեն ընդունել ադրբեջանական ժողովրդի ներկայիս վիճակը», -ասել է նա:

Օրուջլուն խոսել է նաեւ Սիրիայում եւ Իրաքում վարձկան մարտիկների շարքերում կռվող ադրբեջանցիների հնարավոր թվաքանակի մասին:

«Ադրբեջանի բնակչությունը կազմում է աշխարհի մահմեդականների ընդամենը 0,69 տոկոսը: Սիրիայում եւ Իրաքում կռվող ադրբեջանցիների թիվը 1,5 տոկոսից ավելի է: Սա Ադրբեջանի համար լուրջ վտանգ է», -ասել է Օրուջլուն:

Ռուսաստանի Դաշնության Հյուսիսային Կովկասի դաշնային վարչության ներկայացուցիչ Սերգել Մելիքովը օրերս հայտարարել էր, որ Հյուսիսային Կովկասից մոտ 1500 անձինք ԻՊ-ի կազմում կռվում են Սիրիայում եւ Իրաքում:

2014 թվականի աշնանից ԻՊ-ի դեմ միջազգային կոալիցիա է ստեղծվել, եւ ԱՄՆ-ի օդային ռազմական ուժերը հարվածներ են հասցնում ԻՊ-ի դիրքերին: ԱՄՆ նախագահ Բարաք Օբաման երկուշաբթի առաջարկել էր նորացնել այդ հաբաեկչական խմբավորման դեմ ռազմական գործողույունները: Նա նշել է, որ Իրաքում, Սիրիայում եւ Հյուսիսային Աֆրիկայում ԻՊ-ի մարտիկների դիրքերին 5000-ից ավելի օդային հարվածներ են հասցվել:

Արմատական կրոնական ուսմունքների հետեւորդները վերջին շրջանում բավականին ամուր արմատացել են Ադրբեջանում' վերածվելով մշտական գլխավացավանքի իրավապահ մարմինների, Կովկասի մահմեդականներրի վարչության եւ այդ երկրի ամբողջ բնակչության համար: Ադրբեջանում գնալով ավելի մեծ թվով երիտասարդ մարդիկ են հայտնվում վահաբիների եւ սալաֆիների ազդեցության տակ: Ադրբեջանում իսլամի այդ արմատական հոսանքի հետեւորդների թիվը ներկայում, վերջին տվյալներով, անցնում է 40 հազարը: Կարծիքներ են շրջանառվում նաեւ այն մասին, որ Իլհամ Ալիեւի կառավարությունը կարող է թիր ախ դառնալ սալաֆիների համար, որոնք Սիրիայում միացել են իսլամիստական խմբավորումներին եւ մարտական փորձ հավաքած վերադարձել Ադրբեջան:

Թուրքիայում Ադրբեջանի դեսպանատունը հաստատել է ադրբեջանցի մոջահեդների' Թուրքիայի վրայով Սիրիա անցնելու փաստը:

Ադրբեջանական ԶԼՄ-ներն ավելի վաղ հայտնել էին, որ Սիրիայում ապստամբների կողմից նախագահ Բաշար Ասադի դեմ կռվում են մեծ թվով Ադրբեջանի քաղաքացիներ, իսկ Սիրիայում եւ Իրաքում ամբողջ պատերազմի ընթացքում ոչնչացվել են 300-ից ավելի ադրբեջանցիներ: 2013 թ-ի մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ հանուն հավատի) կատարել Սիրիայում:

Որոշ դիտորդների կարծիքով' Սիրիայում օրեց-օր ահագնացող բախումները հնարավոր է ապագայում ներթափանցեն նաեւ Ադրբեջան: Եթե նախկինում ենթադրվում էր, որ այդ թշնամությունը տեղի է ունենալու շիա եւ սունի արմատական վահաբիների միջեւ, ապա այժմ դաժան դիմակայություն է սկսվել արմատական իսլամիստական խմբավորումների միջեւ:

Իսրայելցի փորձագետ, նախկին դիվանագետ, Իսրայելի «Նաթիվ» կենտրոնի նախկին ղեկավար Յակով Քեդմին virtualaz.org լրատվական կայքին տված հարցազրույցում Ադրբեջանում կրոնական հողի վրա լարվածության հետ կապված հայտնել էր, որ Ադրբեջանի համար ամենալուրջ սպառնալիքներից մեկը կրոնական հողի վրա ծայրահեղական (ehval-ruhiye) հոգեվիճակի ուժեղացումն է: «Այս կամ այն իսլամիստական խմբավորումների մարտիկների' Սիրիայից Ադրբեջան վերադարձը կարող է պատճառ դառնալ երկրում ներքին կայունության կտրուկ խախտման եւ ահաբեկչական գործողությունների աճի համար», -ասել է նա: