ԻՊ-ն Դեր Զորում երկու կանանց է գլխատել

«Իսլամական պետություն» իսլամիստական կազմակերպությունը Դեր Զորում երկու կանանց ու մեկ տղամարդու է սպանել' մեղադրելով կախարդանքի մեջ: Ինչպես հաղորդում է «Արմենպրես»-ը' վկայակոչելով արաբական լրատվամիջոցները, տղամարդու սպանության դեպքը տեղի է ունեցել Դեր Զորի Հաջին գյուղաքաղաքում, իսկ կանանցը' Բուքմալ քաղաքում:

ՍԱՆԱ գործակալության տեղեկացմամբ՝ սիրիական բանակը Կունեյտրայի նահանգում ահաբեկչական ծայրահեղական խմբավորումների թաքստոցներ է ոչնչացրել: Բախումները, մասնավորապես, ընթացել են Թալուլ Համր շրջանում, որի արդյունքում «Ջաբհա ան Նուսրա»-ի տասնյակ անդամներ են սպանվել ու վիրավորվել, ոչնչացվել են նրանց պատկանող զենքեր, փոխադրամիջոցներ:

Դամասկոսի մերձակայքում գտնվող Զաբադանի շրջանում ահաբեկիչներին պատկանող զենքեր, զինամթերքներ են ոչնչացվել:

Մյուս կողմից քրդական ուժերն ԻՊ-ի դեմ պայքարում են' վտարելու Ռակկա քաղաքի մերձակայքում գտնվող Այն Այիսա գյուղաքաղաքից, որը գրավել էին ահաբեկիչները:

«Իսլամական պետություն» իսլամիստական ահաբեկչական կազմակերպությունը գործում է Սիրիայի և Իրաքի տարածքներում: 2013 թ. ապրիլին «Ալ Կաիդա»-ի երկու ճյուղերի միավորման արդյունքում ձևավորվել է խմբավորում՝ «Իրաքի և Լևանտի իսլամական պետություն» անվանումով, որի նպատակն էր կազմավորել իսլամական էմիրություն Լիբանանի, Սիրիայի և Իրաքի տարածքներում: 2014 թ. հունիսի 29-ին ԻԼԻՊ-ը Սիրիայի և Իրաքի գրաված տարածքներում հայտարարել է Իսլամական խալիֆաթ հիմնելու մասին, որի խալիֆ է նշանակվել Աբու Բաքր ալ Բաղդադին: Այնուհետև կազմակերպության անվանումը փոխելու որոշում է ընդունվել, և այն վերանվանվել է «Իսլամական պետություն»: Խմբավորման կազմում կռվում են 80 երկրի ապստամբներ: