Անանուն բարերարը 1.8 մլն դոլար է նվիրաբերել Հայաստանում գործող կազմակերպություններին

Անանուն բարերարը 1.8 մլն դոլար է նվիրաբերել Հայաստանում գործող մի շար շահույթ չհետապնդտող երեք կազմակերպությունների: Ինչպես հաղորդում է «Արմենպրես»-ը վկայակոչելով' «Ասպարեզ» պարբերականը, առատաձեռն նվիրատվության շահառուներն են Հայաստան ծառատունկ ծրագիրը (ՀԾԾ), Հայ-ամերիկյան առողջության կենտրոնը և Հայկական ակնաբուժության նախագծը: «Շատ փոքր օգնություն է Հայաստանին»,- նշել է անանուն բարերարը' խոսելով իր կատարած նվիրատվության մասին:

Հայոց ցեղասպանության 100-րդ տարելիցի տարում նման քայլ կատարելով՝ բարերարը ցանկացել է հարգանքի տուրք մատուցել իր նախնիներին, ովքեր ԱՄՆ են գաղթել Արևմտյան Հայաստանից: Նվիրատուի հայրը Միացյալ Նահանգներ է գաղթել Խարբերդից 1912 թվականին, իսկ մայրը' Հայոց ցեղասպանությունից հետո' 1920-ին:

Պարբերականը շատ փոքր տեղեկություններ է հայտնում բարերարի մասին' նշելով, որ նա մասնակցել է Երկրորդ համաշխարհային պատերազմին' ծառայությունը կատարելով Ճապոնիայում, Քլարք համալսարանի շրջանավարտ է և մասնագիտությամբ հաշվապահ: Թեև նա ներգրավված չի եղել հայկական համայնքում, սակայն լավ տեղեկացված է եղել Հայաստանին օգնելու ուղղությամբ տարվող սփյուռքահայության ջանքերին: Տեղեկանալով Հայաստանում գործող երեք կազմակերպությունների մասին և ունենալով առոջական վիճակի վատթարացում՝ բարերարը որոշել է իր ընտանիքի խնայողություները տալ այդ կազմակերպություններին: